Сонуннар

Сүдү киһибит үтүө аата сиэрдээхтик үйэтийэр

Бу күннэргэ улуу тренер Дмитрий Петрович Коркин төрөөбүтэ 95 сылыгар аналлаах республикатааҕы тэрээһиннэр ыытылла тураллар. Ол курдук, бэҕэһээ Чурапчыга олимпийскай чемпион Павел Пинигин тренерин, учууталын туһунан саҥа кинигэтин сүрэхтэниитэ уонна Саха сирэ – Монголия тустууга хамаандаларын көбүөргэ табаарыстыы көрсүһүүлэрэ буолбута.

Оттон бүгүн республикатааҕы Медиа кииҥҥэ (Бэчээт дьиэтэ) бу кэрэ бэлиэ түгэҥҥэ анаан «Коркин. Андаҕар» спектаклы, «Триумф» диэн киинэни билиһиннэрии уонна Павел Пинигин «Мой учитель Дмитрий Коркин. Путь к триумфу» диэн кинигэтин сүрэхтэниитэ буолла.

Пресс-конференцияҕа Саха Республикатын физическэй культураҕа уонна спорка миниистирин бастакы солбуйааччы Александр Бугаев, олимпийскай чемпион Павел Пинигин, СР Спорка бэлэмнэнии киинин дириэктэрэ Михаил Пахомов, кинигэ редактора Александр Егоров-Ильин, саха театрын дириэктэрэ Петр Макаров, режиссердар Сергей Потапов, Михаил Лукачевскай кыттыыны ыллылар.

Кинилэр, үтүөлээх тренер Дмитрий Петрович Коркин 95 сыллаах үбүлүөйүгэр бэлэмнэнии уонна ыытыллар тэрээһиннэр тустарынан билиһиннэрдилэр.

Ааптар Павел Пинигин: «Бу кинигэнэн, Учууталбар, тренербэр үбүлүөйдээх сылынан ытык иэспин толордум. Манна Дмитрий Петрович олоҕун, ону таһынан научнай үлэлэрин ырытан таһаардым. Хаьан да көстүбэтэх сэдэх хаартыскалар киирдилэр. Научнай хайысхалаах түһүмэхтэрэ тренердэргэ, тустууктарга олус наадалаахтар дии саныыбын. Бэйэлэрин үлэлэригэр туһаныахтара диэн эрэнэбин. Түмүгэр бэйэм таптаан туттар албастарбын кюар-кодтаан киллэрдим», — диэн кэпсээтэ. Ол кэмҥэ экраҥҥа, олимпийскай чемпион бэйэтэ айбыт албастарын көрдөрөн, быһааран биэрбитэ, көрсүһүү ис хоһоонун өссө ситэрэн биэрдэ.

Итиэннэ кинигэ оҥоһуллан тахсыытыгар күүс-көмө, өйөбүл буолбут дьоҥҥо бэйэтин үлэтин бэлэхтээтэ.

Кинигэ редактора, суруналыыс Александр Егоров-Ильин Павел Пинигини кытта үлэлэспитэ ыраатта. Өссө 2013 сыллаахха “Триумф Павла Пинигина” кинигэни уонна аҥардас быйыл сайын “Павел Пинигин: Буду побеждать” уонна билигин «Мой учитель Дмитрий Коркин. Путь к триумфу» диэн кинигэлэри бэлэмнээн таһаардылар. Александр Анатольевич саҥа кинигэ уратыларын, Дмитрий Петрович урут сырдатыллыбатах чахчыларын кэпсээһинэ болҕомтону тарта.

Онтон Петр Макаров, Сергей Потапов уонна Михаил Лукачевскай, саха дьоно хайдах курдук тустууга тапталларыттан сөхпүттэрин, киинэ уонна спектакль хайдах быһыылаахтык оҥоһуллубуттарын, оруолларга кимнээх оонньообуттарын, күүс-көмө, өйөбүл буолбуттарын иһитиннэрдилэр. Холобур, «Коркин. Андаҕар» спектакль быйыл сайын көрдөрүллүбүт эбит буоллаҕына, сарсын – Дмитрий Петрович Коркин төрөөбүт күнүгэр театрга хаттаан, өссө тупсарыллан көрдөрүллүөҕэ диэтилэр.

Ити курдук биһиги ытыктыыр сүдү киһибит үтүө аата киинэҕэ, спектакльга, кинигэҕэ – сиэрдээхтик үйэтийэр.

Петр Павлов.

Ааптар хаартыскаҕа уонна видеоҕа  түһэриилэрэ.  

 

Добавить комментарий

Ваш адрес email не будет опубликован. Обязательные поля помечены *

136663
Бүгүн : 172