Сонуннар

Куонкурус кыайыылааҕа – Андрей Александров

Балаҕан ыйын 16-19 күннэригэр Белградка ыытыллан түмүктэммит көҥүл тустууга аан дойду чемпионатыгар анаан, үгэс быһыытынан «Дьулурҕан» республика спорду сэҥээрээччилэригэр анаан куонкурус биллэрбитэ. Онно барыта 33 киһи бэйэтин билгэлээһинин ыытан кыттыбыта.

Куонкурус, «Ыйааһыннарынан чемпионнары ааттааҥ» уонна «Россия бөҕөстөрүттэн бириистээх миэстэҕэ кимнээх киириэхтэрэй?» диэн икки ыйытыыттан турбута.

Чемпионат түмүгүн – куонкуруска киирбит билгэлээһиннэри кытта тэҥнээн, кыайыылааҕы быһаардыбыт. Ол курдук, кыайыылааҕынан көҥүл тустууга ССРС, хурешка РСФСР, хапсаҕайга Саха АССР спортарын маастара Андрей Александров таҕыста. Кини 6 очукуону ылла: Зайн Резерфорд (АХШ), Заурбек Сидаков, Ахмед Усманов (Россия), Дэвид Тейлор (АХШ), Амир Заре (Иран) чемпионнуохтара итиэннэ россияннартан Шамиль Мамедов боруонса мэтээли ылыа диэн сөпкө таайбыт.

Онтон Герман Шкулев уонна Вячеслав Константинов 5-тии очукуону хомуйдулар. Маныаха, куонкурус балаһыанньатын быһыытынан, Герман Шкулев (Орто Халыма) бэйэтин билгэлээһинин урут ыыппытынан, иккис миэстэҕэ тахсар. Андрейы уонна Германы бу ситиһиилэринэн эҕэрдэлиибит!

Кыайыылаах Андрей Александров, «Покорившие Олимп» кинигэни бириис быһыытынан тутуоҕа. Онтон иккис көрдөрүүлээх Герман Шкулев, «Первый борцовский» сурунаал редактора Иван Барашков, “Бриллианты борцовского ковра” диэн саҥа таһаарбыт кинигэтинэн наҕараадаланыа.

Хас биирдии кыттыбыт киһи, куонкурус хоруйдарын dzulurgan.ru сайтка киирэн бэйэтэ – көрүөн, очукуолары ааҕыан уонна ырытыан сөп.

Куонкуруска кыттыбыт дьоҥҥо барыларыгар барҕа махтал! Өссө даҕаны «Дьулурҕан» ыытар үлэтигэр көхтөөхтүк кыттаргытыгар баҕарабыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

161049
Бүгүн : 103