Сонуннар

Коркин-2023: Финалга түөрт бөҕөспүт тустуоҕа

Дьокуускай. Улуу тренер Дмитрий Петрович Коркин төрөөбүтэ 95 сылыгар анаммыт көҥүл тустууга норуоттар икки ардыларынааҕы турнир бастакы күнүн түмүгүнэн бары ыйааһыннарга кыһыл көмүс мэтээл иһин кимнээх тусталлара билиннэ.

Эрдэ иһитиннэрбиппит курдук, быйылгы түһүлгэҕэ 15 дойдуттан уонна Россия 19 регионуттан барыта 178 бөҕөс көбүөргэ тахсан күөн көрүстэ. Кинилэр ортолоругар аҥардас эр дьоҥҥо – Олимпиада призера, аан дойду чемпиона, Европа, Россия уонна Азия чемпионнара, атын да улахан таһымнаах күрэхтэһиилэр кыайыылаахтара кэлэннэр, састаап добуччу күүстээх буолла.

Бастакы күн түмүгүнэн саха тустууктарыттан Виктор Рассадин, Константин Капрынов, Роман Николаев, Ньургун Сергин утарсааччыларын кыайталаан, быһаарыылаах хапсыһыыларга кыттар быраабы ыллылар. Оттон Уйгулаан Иванов (57 кг), Василий Кириллин (79 кг), Максим Толмачев (92 кг) боруонса мэтээл иһин тустуохтара.

Ону тэҥэ Петр Адамов, Николай Захаров, Юрий Васильев, Алексей Копылов (57 кг), Валентин Бурнашев, Юлиан Григорьев, Александр Авелов, Ньургун Терентьев (61 кг), Дьулусхан Тотонов (65 кг), Владислав Кривошапкин, Кирилл Мордовской (70 кг), Николай Сивцев (74 кг), Герман Устинов (79 кг), Денис Максимов (86 кг) – «уоскутар» бөлөххө киирэн, ким үһүс миэстэ иһин хапсыһыыга кыттарын быһаарсыахтара.

Виктор Рассадин аны Таджикистан аатыттан кыттарга сорунан, уһун тохтобул кэнниттэн көбүөргэ эргиллэн, биир дойдулаахтарын сэргэхситтэ. Кини Арменияттан Папикяны, Ирантан Бакшины итэҕэтиилээхтик кыайталаан баран, финалга тахсар иһин киирсиигэ Европа чемпиона Курбан Шираевы кытта тустуутугар бастатан туран, киирсии хаамыытын хонтуруоллаан, баай опытынан баһыйда диэххэ сөп. Хапсыһыы төһө да 2:2 ахсаанынан түмүктэммитин үрдүнэн, быраабыла быһыытынан кыайыы биһиги бөҕөспүтүгэр бэрилиннэ.

Ол кэмҥэ аны сэргэстэһэ көбүөргэ эмиэ 70 киилэҕэ тустар, соторутааҕыта Саха сирин хамаандатын хапытаанынан талыллыбыт Константин Капрынов – аан дойду чемпиона Загир Шахиевы 3:0 ахсаанынан эрэллээхтик хотон, көрөөччүлэри үөртэ. Онон бу ыйааһыҥҥа бастакы миэстэ иһин уолаттарбыт бэйэлэрэ тустар буоллулар. Дьэ, хайалара кыайар? Уһун сыллар усталарыгар биир тэҥ таһымнаахтык тустар улахан үөрүйэхтээх Рассадин дуу, биитэр тахсан эрэр эдэр, дохсун Капрынов дуу? Манна даҕатан эттэххэ, Виктор Рассадин – Коркин турнирын биэс төгүллээх кыайыылааҕа. Бу эмиэ дьоһун көрдөрүү.

Бу күн баара эрэ 18 саастаах Роман Николаев (79 кг) тустууну таптааччылары сүрдээҕин үөртэ. Уол тустар таһыма эбиллэн иһэрэ харахха быраҕыллар. Кимтэн да толлубакка, хорсун киирсиилэри ыытан, финалга тахсыыта – бэйэтэ ситиһии диэххэ сөп.

Онтон Ньургун Сергин сынтарыйбат характердааҕын, кыайыыга дьулуурдааҕын көрдөрдө. Ордук кини дагестанец Тажудин Мухтаровы кыайыыта улаханнык сыаналанар. Манна даҕатан эттэххэ, финалга тахсар иһин киирсиилэргэ бөҕөстөрбүт, билиҥҥи кэмҥэ аан дойдуга бастыҥынан биллэр Дагестан тустууга оскуолатын иитиллээччилэрин кыайыылара (Рассадин – Шираевы, Капрынов – Шахиевы, Сергин – Мухтаровы) сөптөөх хайысхалаах үлэҕэ ситиһиилэр өссө даҕаны кэлиэхтэрин сөбүн итэҕэттилэр.

Уолаттарбытыгар ситиһиилээх тустууну баҕарабыт!

Финалларга көрсүөхтэрэ:

57 кг: Рамиз Гамзатов (Дагестан) — Артур Чебодаев (Красноярскай)

61 кг: Ахмед Идрисов (Дагестан) — Кежик Монгуш (Иркутскай-Тыва)

65 кг: Кежик Чымба (Красноярскай-Тыва) — Артур Бадтиев (Татарстан)

70 кг: Виктор Рассадин (Таджикистан) — Константин Капрынов (Саха сирэ)

74 кг: Давид Баев (Хотугу Осетия) — Тимур Бижоев (Кабардино Балкария)

79 кг: Роман Николаев (Саха сирэ) — Гаджимурад Алихмаев (Брянскай)

86 кг: Артур Найфонов (Хотугу Осетия) — Малик Шаваев (Кабардино Балкария)

92 кг: Амирхоссейн Фирузпур (Иран) — Ньургун Сергин (Саха сирэ)

97 кг: Шамиль Мусаев (Дагестан) — Абольфаз Бабалу (Иран)

125 кг: Анзор Хизриев (С-Петербург) — Амирреза Масуми (Иран).

Кыайыылаахтары быһаарар хапсыһыылар бырагыраама быһыытынан бүгүн киэһэ 18:00 чаастан «Өрөгөй» Спорка бэлэмнэнии киинигэр буолуохтара. Онтон «уоскутар» бөлөх тустуулара күнүс 11:00 чаастан саҕаланан баран, тэрийээччилэр быһаарыыларынан, тута үһүс миэстэ иһин киирсиилэр ыытыллыахтара.

PS: Бөҕөстөрбүт биирдиилээн хапсыһыыларын Дьулурҕан ютуб каналыгар көрүөххүтүн сөп.

Күндү куорат олохтоохторо уонна ыалдьыттара кэлэн тустууну көрөргүтүгэр, спорт бырааһынньыгар кыттыһаргытыгар, бэйэбит уолаттарбытыгар ыалдьаргытыгар ыҥырабыт! Киириитэ – босхо, эбиитин өссө бааттаахтар лотерея бириистэригэр тиксиэххитин сөп.

Петр ПАВЛОВ.

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *

161061
Бүгүн : 115