Сонуннар

Быыстапка ыҥырар, угуйар күүһүгэр болҕойуоҕуҥ

Саха омугу үрдүк үктэлгэ таһаарбыт улуу тренер – Саха АССР үтүөлээх учуутала, ССРС, РСФСР, Саха АССР үтүөлээх тренерэ, “Бочуот Знага” уонна Октябрьскай революция орденнар кавалердара, Саха сирин “ХХ үйэ Бастыҥ киһитэ” Дмитрий Петрович Коркин төрөөбүтэ 95 сылынан, “Строительнай” Атыы киинин быыстапкалыыр саалатыгар балаҕан ыйын 5-14 күннэригэр “Коркинныы олоруохха! Коркинныы айыахха!” диэн быыстапка арыллан үлэлиир.

Бу, үтүө үгэскэ кубулуйбут улахан республикатааҕы таһымнаах тэрээһини бэһис сылын Саха Республикатын культуратын үтүөлээх үлэһитэ Татьяна Афанасьевна Гоголева үүннээн-тэһииннээн салайан ыытар. Быыстапкаҕа – Саха сирин музейдарын, национальнай библиотека, биллиилээх бөҕөстөр уонна коллекционердар сэдэх экспонаттара туруоруллуннулар.

Быыстапка үлэлиир кэмигэр күннэтэ былаан быһыытынан, сахабыт тустуутун сайдыытыгар туһаайыллыбыт “төгүрүк остуоллар”, лекциялар, Чурапчы интэринээт-оскуоланы араас сылларга бүтэрбит оҕолор түмсүүлэрэ, саҥа кинигэлэр сүрэхтэниилэрэ тэриллэн ыытыллаллар.

Быыстапка үөрүүлээх аһыллыыта улуу тренер Д.П. Коркин төрөөбүт күнүгэр сөп түбэһиннэрэн – балаҕан ыйын 5 күнүгэр буолла. Кэрэ бэлиэ түгэҥҥэ Саха Республикатын физическэй культураҕа уонна спорка миниистирэ Леонид Николаевич Спиридонов кыттыыны ылла, маннык кэрэ быыстапканы тэрийээччилэргэ махтанна. Быыстапка – бу история кэрэһитэ. Ону туоһулаан үөрүүлээх аһыллыыга “Строительнай” рынок салалтата, Д.П. Коркин иитиллээччилэрэ – Чурапчытааҕы спортивнай интернат-оскуоланы араас сылларга үөрэнэн бүтэрбиттэр – бэйэлэрин биһиоэбиллэрин биллэрэн тыл эттилэр. Ол курдук, ыраах Санкт-Петербургтан кэлбит спорт маастара Гаврил Афанасьевич Троев, спорт үтүөлээх маастардара Александр Николаевич Иванов, Василий Николаевич Гоголев, норуоттар икки ардыларынааҕы кылаастаах спорт маастара Афанасий Иванович Заболоцкай уо.д.а. кытыннылар.

Күндү куорат олохтоохторо уонна ыалдьыттара, бу ыйыллыбыт күннэргэ кэлэн быыстапканы көрүҥ, сэргээҥ, санааҕытын атастаһыҥ. Ордук чуолаан, быыстапка эдэр ыччакка ананар. Онон бу, биһиги, сахалар киэн туттар сүдү киһибитигэр – Дмитрий Петрович Коркиҥҥа сүгүрүйэн, кэриэстээн тэриллэр быыстапкаҕа бастатан туран, оҕолор – Р.М. Дмитриев аатынан Олимпийскай эрэл училищетын, куорат атын да оскуолаларын үөрэнээччилэрэ, В.П. Керемясов аатынан спортивнай оскуола оҕолоро күнүнэн быысаһан сылдьаллара, көрөллөрө күүтүллэр. Быыстапка – биһиги спорпут историятын, бастыҥ тренердэрбитин, спортсменнарбытын үйэтитиигэ иитэр-үөрэтэр суолталааҕын умнумуоҕуҥ.

Буолар сирэ – Дьокуускай куорат, “Строительнай” Атыы-эргиэгэн киинин бастакы этээһигэр быыстапкалыыр саалата. Жорницкай уул. 35 №-рэ (кыһыл өҥнөөх дьиэ).

Петр Павлов.

Ааптар хаартыскаҕа түһэриилэрэ.

 

 

Добавить комментарий

Ваш адрес email не будет опубликован. Обязательные поля помечены *

136698
Бүгүн : 207