Куонкуруска кимнээх инники иһэллэрий?

Дьэ, туох да диэбит иһин, көҥүл тустууга аан дойду чемпионата соһуччу түмүктэрдээх буолла.

Киһи эрэ үксэ чемпионнуо диэбит дьоно: Заур Угуев, Абасгаджи Магомедов, Амузад Халили, Кайл Дэйк, Абдулрашид Садулаев быйыл уруккуларыгар тиийбэт, мөлтөһүөр көрдөрүүлэрэ, ол оннугар дьон улаханнык аахайбатах Стеван Мичича, Исмаил Мусукаева тахсыылаах тустуулара… барыта соһуччу кэриэтэ буолла.

Син ол курдук, биһиги куонкуруспутугар соһуччу түмүктэр эмиэ бааллар. Ханнык да түгэҥҥэ (элбэх сыыстарыы баарын да үрдүнэн), куонкурус түмүгэ таһаарыллар. Ол курдук, билиҥҥи, бүтэһик икки ыйааһын (65 кг уонна 97 кг) иннинээҕи ааҕыынан Вячеслав Константинов уонна Андрей Александров 5-тии очукуолаах инники таҕыстылар. Кинилэргэ 4-түү очукуолаах Герман Шкулев, Тимур Константинов, Гаврил Скрябин чугастар.

Онон эмиэ, бэҕэһээ 92 кг финалыгар Осман Нурмагомедов утарсааччытын казах Атймуханы, хапсыһыы бүтэрэ биир мүнүүтэ иннинэ кыайан иһэн кыл мүччү хотторбутун курдук балаһыанньа эмиэ тахсан кэлиэн сөп.

Куонкурус түмүгэ сарсын күн иккис аҥарыгар, үчүгэйдик сыныллан ааҕыллан баран сайтка тахсыаҕа. Ким кыайбытын онно билиэхпит. Сайты кэтии сылдьыҥ.

«Дьулурҕан».