История

Александра Коркина: “Дмитрий Петрович Чиэһи, Суобаһы өрө туппута”

Республикаҕа ХХ үйэ бастыҥ киһитинэн билиниллибит Саха сирин оскуолаларын үтүөлээх учуутала, ССРС, РСФСР, Саха АССР үтүөлээх тренерэ, ССРС физическэй култуураҕа туйгуна, “Октябрьскай революция” уонна “Бочуот Знага” орденнар кавалердара Дмитрий Петрович Коркин төрөөбүтэ 95 сылын үөрүүлээхтик бэлиэтээһин былааннанар.

Бу кэрэ бэлиэ түгэҥҥэ сөп түбэһиннэрэн улуу тренер олоҕун доҕоро, педагогическай үлэ бэтэрээнэ, билигин 88 сааһыгар сылдьар Александра Семеновна Коркинаны кытта аҕыйах сыллааҕыта көрсөн, санаатын үллэстэригэр көрдөспүппүн бэчээккэ таһаарабын.

-Дмитрий Петрович үлэһит, киһи быһыытынан эҥкилэ суох киһи этэ. Олоҕун устата үлэтинэн олорбута, туохха да атыҥҥа арылдьыйбатаҕа. Күннэри-түүннэри үлэлиир этэ. Утуйа сытан ардыгар түүн туран бэлиэтэнэр, сурунар буолара. Саамай кылаабынайа, оҕолору наһаа таптыыр, харыһыйар этэ. Наар ол оҕо хайдах сылдьарын, дьарыктанарын кэпсиирэ.

Кини тэрилтэтигэр профсоюз бэрэссэдээтэлэ этэ. Инньэ гынан коллективы бүтүннүү тутан олорбута. Бары биир өйүнэн-санаанан олорбуттара, үлэлээбиттэрэ. Кини эттэ да, ким даҕаны тугу да утарбат. Оччотооҕу дьон наһаа көхтөөх, түмсүүлээх этилэр. Ордук улахан күрэхтэһиилэр иннинэ эрдэттэн бырааһынньык курдук бэлэмнэнии бөҕө, барыта үөрэ-көтө… Ыал аайы ыалдьыт, хоноһо бөҕө буолара. Нэһилиэнньэ күрэхтэһиини наһаа сөбүлүүрэ. Били кэпсииллэрин курдук, “оҕо буоллар ытаатын, ынах буоллаҕына маҕыраатын” диэбит курдук, хаһаайкалар сүрүннээн күрэхтэһиинэн олорбуттара. Аны тустууга сыыһа сууттааҥҥын туһаммаккын, барытын билэллэрэ сүрдээх, блокноттарыгар суруна сылдьаллар. Кырдьыктарын туруорсан мөккүһэр чүөчэлэр бааллара.

Чэ, мин билигин сатаан санаабаппын, хайдах итинник олоруллубута эбитэ буолла? Онно биһиги бары үөрэ-көтө олорбуппут, үлэлээбиппит ээ.

Үлэлиэххэ, эппит тылга туруохха наада. Дьону түмүөххэ. Дмитрий Петрович дьону наһаа түмэр дьоҕурдааҕа.

Эдэр ыччат, биһиги инникибитин буоллаҕа дии. Билигин усулуобуйа урукку курдук буолбатах, оҕолор дьулуурдаах, үөрэхтээх, билиилээх буолуохтарын, элбэҕи ааҕан, бэйэлэрин иитиниэхтэрин наада. “Самовоспитание” диэн. Дмитрий Петрович оннугу ирдиирэ. Оҕо бэйэтин бэйэтэ иитинэрин курдук туһаайан үлэлиирэ. Туох эмэ ситиһии буоллаҕына, “эһиги онно кыһанымаҥ, бу дьоннор үлэлэрэ, ону убаастыахха наада” диирэ. Үлэ дьонун ытыктыахха наада диирэ. Кырдьаҕастары кытта кэпсэтэрин наһаа сөбүлүүрэ. Былыргы олох, былыргы дьоннор, күүстээхтэр тустарынан интэриэһиргээбитэ. Кэнники ат спордун наһаа сэҥээрэр буолбута. Инньэ гынан, ат спордун туһунан кинигэлэри булан ааҕара. Итиэннэ: “Киһини мин бэлэмнээтим, таһаардым, аны атынан дьарыктаммыт киһи” – диэн баҕалаах этэ.

Бу олоххо чиэһинэй буолуохха наада. Дмитрий Петрович – Чиэс, Суобас диэни өрө туппут киһи. Чиэһинэй буолуохха, элбэҕи ааҕыахха-билиэххэ. Итиэннэ дьону ытыктыыр, кинилэр үлэлэрин сыаналыыр буоларга оҕолору үөрэтиэххэ. Оҕолор бэйэлэрэ туруоруммут сыалларын олох ситиһэр иһин сыалланыахтаахтар. Билиҥҥи олох наһаа үчүгэй буоллаҕа дии, урукку курдук буолуо дуо?

Билигин Дмитрий Петрович Коркины төһө кыалларынан өрө туталлар, ытыктыыллар, кини туһунан элбэҕи билэ-көрө сатыыллар. Бу кэнники ордук. Ити сорох кэмҥэ, соторутааҕыта оҕолор оннооҕор: “Роман Дмитриев диэн кимий?” диэн соһуппуттара баара. Итини, оскуолаҕа үчүгэйдик үөрэтиэххэ наада, оҕолору.

Петр ПАВЛОВ.   

Ааптар хаартыскаҕа түһэриитэ.        

2020 с.           

Добавить комментарий

Ваш адрес email не будет опубликован. Обязательные поля помечены *

201748
Бүгүн : 31