Сонуннар

Аан дойду чемпионатыттан соһуччу түгэннэр

Дьэ, бу күннэргэ бары долгуйа кэтэспит, күүппүт тустууга Аан дойду чемпионата Сербия судаарыстыбатыгар, Белград куоракка буолан ааста.

Хааччаҕынан, санкциянан сибээстээн, Арассыыйа спортсменнара өр кэмҥэ тас дойдутааҕы күрэхтэргэ кыттыыны ылбакка гынан баран, нейтральнай (AIN) статуһунан күрэхтэстилэр, ол иһигэр сахалар бэйэбит легионер уолаттарбыт кииристилэр. 125 киилэҕэ Айаал Лазарев (Кыргызстан) 9-с миэстэ, 61 киилэҕэ Андрей Бекренев (Белоруссия) уонна Николай Охлопков (Румыния) 13-с, 26-с миэстэ, 57 киилэҕэ Владимир Егоров (Македония) 16-с миэстэ, 65 киилэҕэ Георгий Окороков (Австралия) уонна Ньургун Скрябин (Беларусь) 35-с, 38-с миэстэлэри ылаттаатылар.

Ону таһынан Арассыыйа сүүмэрдиир хамаандатыттан 57 киилэҕэ Заур Угуев 5-с миэстэ, 61 киилэҕэ Абасгаджи Магомедов 2-с миэстэ, 65-кэ Шамиль Мамедов 3-с миэстэ, 70-ҥа Евгений Жербаев 19-с миэстэ, 74-кэ Заурбек Сидаков үһүс төгүлүн Аан дойду чөмпүйүөнэ буолла, 79-ка Ахмед Усманов бастаата, 86-ҕа Арслан Багаев 12-с миэстэ, 92-гэ Владислав Валиев 10-с миэстэ, 97-ҕэ Абдулрашид Садулаев 6-с миэстэ уонна 125 киилэҕэ Абдула Курбанов 5-с миэстэни ылары ситистилэр.

Атын дойдуттан кытта сылдьар легионердарбыт үчүгэй түмүгү көрдөрдүлэр. Ол курдук, 65 киилэҕэ Венгрия аатыттан киирсэр биир аатырбыт бөҕөс 30 саастаах Исмаил Мусукаев соһуччу баҕайытык утарсааччыларын барыларын баһыйа тутан чөмпүйүөн үрдүк аатын сүктэ. Өссө биир саамай киһи үөйбэтэх өттүттэн, 97 киилэҕэ 20 саастаах Ахмед Тажудинов – Кайл Снайдер, Абдулрашид Садулаев, Магомедхан Магомедов курдук күүстээх, опыттаах, ааттаах-суоллаах бөҕөстөрү барыларын кыайталаан бастаата. Онон уопсай түмүккэ, 2024 сылга Парижка ыытыллар Олимпиадаҕа саамай элбэх лицензияны Америка холбоһуктаах штата уонна Арассыыыйа ыллылар.

Түмүктээн этэр эбит буоллахпына, өтөрүнэн буолбатах чаҕылхай, үрдүкү таһымнаах күрэхтэһии буолан ааста диэн бэлиэтээн этиэххэ наада. Уолаттар бары дьарыктарын эбэн-сабан биэрбиттэрэ, кыаҕырбыттара, күүһүрбүттэрэ уопсай хартыынаҕа сүрдээҕин биллибит. Инникитигэр өссө үчүгэй көрдөрүүлэри көрдөрүөхтэрэ, дьоннорун-сэргэлэрин үөрдүөхтэрэ диэн бигэ эрэнэбин.

Милена АНДРЕЕВА.

 

Добавить комментарий

Ваш адрес email не будет опубликован. Обязательные поля помечены *

163134
Бүгүн : 107