Сонуннар

Үтүө дьоммут ааттара үйэтитилиннэ

Доллу нэһилиэгэр – Саха сиригэр Үлэ, физкултуура хамсааһынын 100 сылларыгар аналлаах үтүө көҕүлээһин чэрчитинэн, нэһилиэкпит спортивнай олоҕо сайдарыгар, инники кэскилэ, кэнчээри ыччата эт-хаан өртүнэн чөл туруктаах, үгүс элбэх спортсменнар үүнэн-сайдан, иитиллэн тахсар сирдэрэ буоллун диэн, үлэлиир-хамсыыр успуорт саалабытыгар бэлиэ түгэн буолан ааста.

Өр сылларга нэһилиэкпит социальнай-спортивнай олоҕо инники күөҥҥэ тахсарыгар үтүө суобастаахтык үлэлээбит, “Кэскил” успуорт саалабытын туппут киэн туттар биир дойдулаахтарбыт ‒ М.Горькай аатынан сопхуос Күөллэрики отделениетын управляющайынан үлэлээбит Василий Алексеевич Птицын уонна Доллу нэһилиэгин бастакы баһылыга, Мэҥэ Хаҥалас улууһун, Доллу нэһилиэгин Бочуоттаах гражданина Николай Ильич Скрябин сырдык ааттара үйэтитилиннэ. “Кэскил” успуорт саалатыгар сырдык ааттарын үйэтитэр истиэндэ арылынна.

Төҥүлү, Доллу нэһилиэктэрин Бочуоттаах олохтооҕо Илья Ильич Скрябин, РСФСР, СӨ профтехүөрэхтээһин туйгуна, Төҥүлү нэһилиэгин Бочуотун кинигэтигэр киллэриллибит, Николай Ильич кэргэнэ Валентина Борисовна Скрябина, СӨ муниципальнай сулууспа туйгуна, өр сылларга Доллу нэһилиэгин баһылыгынан үлэлээбит, үлэ бэтэрээнэ, Доллу нэһилиэгин, Мэҥэ Хаҥалас улууһун Бочуоттаах гражданина, В.А. Птицын төрөппүт уола Иннокентий Васильевич Птицын лиэнтэни быстылар.

Саала 1992 с. олунньу 23 күнүгэр нэһилиэкпит хаба ортотугар икки этээстээх киэҥ-куоҥ успуорт уораҕайа дьэндэйбит, үлэҕэ киирбит үөрүүлээх күнүнэн биллэр. Саала тутуллуоҕуттан нэһилиэк олоҕор биллэр сэргэхсийиилэр, уларыйыылар буолбуттара. Ол курдук, нэһилиэк спортивнай олоҕо инники күөҥҥэ тахсан, улууска биир бастыҥнар кэккэлэригэр сылдьар. Василий Алексеевич Птицын Тумул бөһүөлэгэр улахан тутуулары саҕалаабыт салайааччынан биллэр. 1988 с. сопхуос дириэксийэтигэр туруорсан, норуот күүһүнэн тутуу саҕаламмыта. Тутууну тиһэҕэр тиэрдибит, өр сылларга М.Горькай аатынан сопхуоска салайар үлэҕэ сылдьыбыт уонна Доллу нэһилиэгин бастакы баһылыганан үлэлээбит Николай Ильич Скрябин буолар.

Николай Ильич Тумул бөһүөлэгэ туспа кыраныыссаланан Доллу нэһилиэгэ буоларыгар күүскэ үлэлэспитэ, үтүмэн кылаатын биэрбитэ. Эбийиэктэр тутуулара салҕанан, үлэҕэ киирбиттэрэ. Нэһилиэк социальнай-экэнэмиичэскэй, спортивнай, култуурунай олоҕо сайдарыгар өр сылларга үтүө суобастаахтык үлэлээбитэ.

Бүгүҥҥү бэлиэ күммүтүгэр үтүө дьоммут ааттарын үйэтитэн мемориальнай дуоска, өйдөбүнньүк истиэндэ арыллан, кинилэр сырдык ааттара “Кэскил” успуорт уораҕайыгар иҥэрилиннэ. Николай Ильич дьиэ кэргэнин аатыттан 75 тыһыынча солкуобай суумалаах сэртипикээти дьиэ кэргэнэ туттарда. Түгэнинэн туһанан нэһилиэккэ успуорт сайдарыгар үтүмэн кылааты киллэрсибит биһиги биир дойдулаахтарбытыгар, успуорт бэтэрээннэригэр Доллу нэһилиэгин баһылыга Николай Сивцев Махтал суруктары туттарда.

Улуус физическэй култуураҕа уонна успуорка управлениетын сүрүннүүр исписэлииһэ  Виталий Пестряков Бочуотунай грамоталарынан педагогическай үлэ бэтэрээнэ, СӨ физическэй култуураҕа уонна успуорка туйгуна, Доллу нэһилиэгин Бочуоттаах гражданина Анастасия Попованы, СӨ физическай култуураҕа уонна успуорка туйгуна, үлэ, успуорт бэтэрээнэ, нэһилиэккэ успуорду көҕүлээччи, Доллу нэһилиэгин Бочуоттаах гражданина Ким Попову, Арассыыйа үөрэҕириитин Бочуоттаах үлэһитэ, СӨ тыа хаһаайыстыбатын туйгуна, СӨ ытыыга успуорт маастара, үлэ, успуорт бэтэрээнэ Альбина Шаринаны, успуорт бэтэрээнэ, нэһилиэккэ успуорду көҕүлээччи, Доллу нэһилиэгин Бочуоттаах гражданина Дмитрий Стручкову, Үлэ, успуорт бэтэрээнэ, нэһилиэккэ успуорду көҕүлээччи Дария Катакиновны, үлэ, успуорт бэтэрээнигэр, нэьилиэккэ успуорду көҕүлээччи, Доллу нэһилиэгин Бочуоттаах гражданина Виктор Максимовы, үлэ, успуорт бэтэрээнэ Октябрина Борисованы, СӨ тыа хаһаайыстыбатын бэтэрээнэ, Доллу нэһилиэгин бочуоттаах гражданина, үлэ, успуорт бэтэрээнэ Михаил Птицыны, СӨ тыа хаһаайыстыбатын туйгуна, үлэ, успуорт бэтэрээнэ Анатолий Лонгиновы, педагогическай үлэ, успуорт, сыана бэтэрээнэ Анастасия Баишеваны, СӨ тыа хаһаайыстыбатын туйгуна, үлэ, успуорт бэтээрээнэ Василий Свинобоевы, СӨ тыа хаһаайыстыбатын туйгуна, СӨ агробырамыысыланнаһын комплексын Бочуоттаах үлэһитэ, үлэ, успуорт бэтэрээнэ Петр Птицыны наҕараадалаата.

Улуус уонна Доллу нэһилиэгин Бочуоттаах гражданина, «Алгыс» бэтэрээннэр түмсүүлэрин бэрэссэдээтэ Дмитрий Слепцов Махтал тылын, Эҕэрдэ суругун успуорт бэтэрээннэригэр туттартаата.

Салгыы Ылдьаа Скрябин түөлбэлэр икки ардыларыгар эр дьоҥҥо эстэпиэтэни тэрийдэ.

Евгения ПТИЦЫНА.

Мэҥэ Хаҥалас.

Добавить комментарий

Ваш адрес email не будет опубликован. Обязательные поля помечены *

186572
Бүгүн : 276