Сонуннар

Лев Павлов кыттыытыгар сөптөөх түмүктэри оҥоруохха!

Иордания Амман куоратыгар 20-гэр диэри саастаах бөҕөстөр аан дойдуга бастыыр иһин күрэхтэһиилэрин көҥүл тустууга бастакы финаллара түмүктэннилэр.

Үчүгэйэ диэн, Тустуу аан дойдутааҕы түмсүүтүн (UWW) быһаарыытынан бу күрэхтэһии Польшаттан Иорданияҕа көһөрүллэн, бу иннинэ хааччахтааһыҥҥа сылдьыбыт Россия уонна Беларусь хамаандалара кыттыыны ылбыттара буолар. Онон спортсменнарбыт тустууларын, хайдах туруктаахтарын таайа сатаабакка – бэйэбит көрдүбүт, сыаналаатыбыт.

Бу түһүлгэҕэ саас Дьокуускайга ыытыллыбыт Россия күрэхтэһиитин кыайыылаахтара кытыннылар. Ол иһигэр биһиги биир дойдулаахпыт Лев Павлов 57 киилэҕэ туһунна. Кини бастаан уолаттарга аан дойду 50 киилэҕэ чемпиона, АХШ уонна Панамерика күрэхтэһиилэрин кыайыылааҕа американец Люк Лилледалы кытта көрсөн 2:9 ахсаанынан хотторон кэбиспитэ. Салгыы күрэхтэһиигэ Лилледаль ситиһиилээхтик тустан финалга тахсыбыта. Онон биһиги уолбутугар суолу аһан биэрбитэ.

Онуоха Лев маҥнай эдэрдэргэ Европа күрэхтэһиитин призера Толга Озбегы (Турция) 5:1 ахсаанынан хотон баран, эмиэ Европа континенын эдэрдэргэ призера Эдик Арутюняҥҥа (Армения) 3:6 ахсаанынан хоттордо. Онон боруонса мэтээл иһин тустар кыахха киирбэтэ.

57 киилэҕэ түмүк маннык буолла: 1. Юто Нашиучи (Япония), 2. Люк Лилледаль (АХШ), 3. Нодирбек Жуманазаров (Узбекистан), 3. Эдик Арутюнян (Армения).

Эрдэ эппитим курдук, уолбут тустуутун көрдүбүт. Манна ыксаллаах түмүктэри оҥоро охсор, кими эрэ сирэй-харах анньа сатыыр сыыһа буолуо. Бастатан туран, туһааннаах тренердэр уонна специалистар Лев Павлов бу тустуутун, бэлэмнэниитин үчүгэйдик сыныйан туран ырытыахтарын, бэйэлэригэр түмүк оҥостуохтарын, сыыһалары-халтылары туоратыахтарын, инники сөптөөх соруктары туруоруохтарын наада.

Олох салҕанар. Аны бүгүн бу күрэхтэһиигэ иккис кыттааччыбыт Россия чемпиона Александра Копылова (50 кг) тустар. Бастакы утарсааччыта – Казахстан кыыһа. Эрэнэ кэтэһэбит…

PS: Лев Павлов американецтыын тустуутун уонна кини кыттыбыт ыйааһынын быһаарыылаах хапсыһыытын «Дьулурҕан» хаһыат ютуб каналыгар киирэн көрүөххүтүн, бэйэҕит сыаналыаххытын сөп.

Петр ПАВЛОВ.   

2 комментария для “Лев Павлов кыттыытыгар сөптөөх түмүктэри оҥоруохха!

  • Тренердэрэ Николай Романов, Герман Контоев тоҕо барсыбатылар? Тренердэри ыыталаабакка чиновниктары круизтатары хаһан тохтотоллор?

    Ответ

Добавить комментарий

Ваш адрес email не будет опубликован. Обязательные поля помечены *

176535
Бүгүн : 101