Сонуннар

Павел Пинигин аатынан түһүлгэ бастакы күнүгэр…

Бүгүҥҥүттэн «Өрөгөй» Спорка бэлэмнэнии киинигэр олимпийскай чемпион, аан дойду үс төгүллээх чемпиона, спорт үтүөлээх маастара Павел Пинигин аатынан «Саха сирин тимир суоллара» тэрилтэ бирииһигэр көҥүл тустууга уолаттарга икки бөлөҕүнэн Бүтүн Россиятааҕы уонна норуоттар икки ардыларынааҕы турнирдар биэс көбүөрүнэн саҕаланнылар.

«Өрөгөй» иһигэр этэргэ дылы, киһи тыына-быара хаайтарыах курдук салгын суоҕун тэҥэ, оттон көбүөргэ таһырдьатааҕар өссө итии уонна сытыы хапсыһыылар саҕаланнылар. Оҕолор – оҕолор курдук, өр толкуйдуу, саараҥныы барбакка, сып-сап тустан иһэллэринэн сэргэхтэр.

Быйылгы, Саха сиригэр физкультурнай хамсааһын тэриллибитэ 100 сылыгар анаммыт күрэхтэһии биир өртүнэн олимпийскай чемпиоммут Павел Пинигин төрөөбүтэ 70 сылыгар сыһыаннаах. Түһүлгэҕэ икки бөлөҕүнэн 500-тэн тахса эдэр бөһөс – Иркутскай уобаластан, Тываттан, Бурятияттан, Амурскай уобаластан, Забайкальскай, Приморскай кыраайдартан, Кемеровоттан, Ингушетияттан, Саха сириттэн итиэннэ Беларусьтан, Казахстантан, Кыргызстантан, Таджикистантан, Монголияттан күөн көрсөллөр.

Быһааран эттэххэ, 16-гар диэри саастаахтар Бүтүн Россиятааҕы, оттон 18-гар диэри саастаахтар норуоттар икки ардыларынааҕы турнирдарга ким бастыҥын быһаарсыахтара.

Күрэхтэһии үөрүүлээх аһыллыытыгар Саха Республикатын физическэй культураҕа уонна спорка министрэ Леонид Спиридонов, «Саха сирин тимир суоллара» тэрилтэ бастакы салайааччыта Дмитрий Трофимов уонна түһүлгэ бочуоттаах ыалдьыттара: 68 киилэҕэ аан дойду чемпионатын икки төгүллээх призера Буяндергер Болд (Монголия), спорт маастара Радислав Намажап (Тыва) кыттыыны ыллылар – Павел Павловиһы эҕэрдэлээтилэр, бэйэлэрин бэлэхтэрин туттардылар.

Дьэ, ол кэнниттэн биэс көбүөрүнэн эмиэ хапсыһыылар салҕанан бардылар. Этэргэ дылы, ким ордук бэлэмнээх, күүстээх, кыайыыга дьулуурдаах – ол кыайан истэ.

Манна даҕатан эттэххэ, күрэхтэһиини бүгүн саҕалаабыттар – өйүүн ким кыайыылаах аатын ыларын быһаарсыахтара. Тустуу салҕанар. Күрэхтэһии программата dzulurgan.ru сайтка бэчээттэнэн турар…

PS: Түһүлгэ үөрүүлээх аһыллыытын түгэннэрин уонна биирдиилээн хапсыһыылары Дьулурҕан ютуб каналыгар көрүөххүтүн сөп. Бука барыгытын, Спортивнай суруналыыстар аан дойдутааҕы күннэринэн эҕэрдэ!

Петр ПАВЛОВ.

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *

201702
Бүгүн : 418