Сонуннар

Европа көбүөрүгэр чаҕылхай кыттыы!

Венгрия Капошвар куоратыгар 17-гэр диэри саастаахтарга спортивнай тустууга Европа күрэхтэһиитэ буолан ааста. Бу күрэхтэһиигэ Россия хамаандата AIN диэн нейтральнай атлеттар быһыытынан киллэриллэн кытынна. Хамаанданы биһиги биир дойдулаахпыт, Россия спортивнай тустууга федерациятын эппиэттээх үлэһитэ, спорт үтүөлээх маастара Петр Юмшанов салайан илдьэ сырытта.

Көҥүл тустууктар хаһан да буолбатах ситиһиилэннилэр, 10 ыйааһынтан 9-гар кыайдылар. Тустуу историятын өҥөйөн көрдөххө, маннык көрдөрүүнү 1988 сыллаахха Манчестерга (Англия) ыытыллыбыт Европа эр дьоҥҥо чемпионатыгар Иван Ярыгин баһылыктаах ССРС көҥүл тустууга хамаандата ситиспитэ. Уон ыйааһынтан – тоҕуһугар кыайбыта. Онно хамаанда састаабыгар биһиги биллиилээх бөҕөспүт, спорт үтүөлээх маастара Василий Гоголев 48 киилэҕэ чемпион үрдүк аатын ылбыта. Онон историяҕа киирэр ураты ситиһиигэ кыттыспытынан, кыһыл көмүс мэтээл аҕалбытынан биһиги киэн туттабыт.

Аны Россия уолаттара ити көрдөрүүнү Венгрия көбүөрүгэр хатылаатылар. Эппитим курдук, хамаанда салайааччытынан Россия үтүөлээх тренерэ Петр Петрович Юмшанов сылдьыста. Тэрийэр, салайар үлэтин таһынан кини уолаттары кыайыыга көҕүлээтэ, бэйэтэ көбүөргэ тахсан секунданнаата.

Бу күрэхтэһиигэ саха киһитин кыттыһыыта итинэн бүппэт. Билигин Санкт-Петербурга олорор, үлэлиир Ньургуйаана Соркомова эрчийэр кыыһа Лилия Ермохина 58 киилэҕэ үһүс бириистээх миэстэҕэ тахсан, боруонса мэтээлинэн наҕараадаланна. Онон төһө да бу сырыыга бэйэбититтэн кыттааччыбыт суоҕун үрдүнэн, Россия хамаандата ситиһиилэнэригэр биир дойдулаахтарбыт салайааччы уонна тренер быһыытынан кыттыспыттарынан киэн туттабыт.

Петр Юмшановы уонна Ньургуйаана Соркомованы бу дьоһун ситиһиилэринэн эҕэрдэлиибит! Өссө да төрөөбүт дойдуларын ааттата туралларыгар баҕарабыт!

Сахата суох – тустуу суох! Тустуута суох – саха суох!

Петр Павлов.

Добавить комментарий

Ваш адрес email не будет опубликован. Обязательные поля помечены *

161089
Бүгүн : 143