Сонуннар

Чемпионат түмүктэнэрэ үс туур хаалла

Былырыыҥҥы нуучча дуобатыгар бастыыр иһин чемпионат кэнниттэн эр дьонно уонна дьахталларга алталыы оонньооччу быйылгы дьылга оонньуурга быраабы ылбыттара.

Атыттар чемпионат 1 лигатыттан (устуу), Дьокуускай куорат чемпионатыттан (биирдии), фестиваль тумугунэн (биирдии) уонна республикатааҕы дуобат федерациятын быһаарыытынан дьыл түмүгүнэн үрдүк көрдөрүүлээх дуобатчыттар оонньуурга көҥүл ылбыттара.

Дьахталлар оонньууларын бэс ыйын 30 күнүттэн, эр дьон от ыйын 1 күнүттэн саҕалаабыттара. Уопсай чемпионат тэрээһинэ физическэй культура уонна маассабай спорт управлениетыгар (начальник Р.И. Оконешников) сүктэриллэн, саҥа уларытыы быһыытынан Саха сирин олохтоохторо оонньонуллар партиялары ситим нөҥүө быһа көрөн, санааларын үллэстэ олороллор. Чемпионат кыттыылаахтара республика дуобатын федерациятын көҕүлээһининэн кытаанах сүүмэрдээһини ааһаннар, чемпионат үрдүк таһымын бэйэлэринэн көхтөөхтүк кыттаннар, өй-санаа киирсиитин киэргэтэн эрдэхтэрэ.

Чемпионат сүрүн балаһыанньата российскай  чемпионаттан уратыта суох, ол курдук, салҕыы  маннык балаһыанньаларга олоҕуран  Аан дойду күрэхтэһиилэригэр, чемпионаттарыгар биһиги дуобатчыттарбыт кыттыыны ылыахтара.

Кыттааччылар Аан дойдутааҕы дуобат федерациятынан бигэргэммит сэрибиэйинэн, эрдэ талыллыбыт хаамыыларынан “жеребьёвка первоначальных ходов и позиций” оонньууллар.

Чемпионакка кыттыыны ыла сылдьаллар: Аан дойду 12 төгүллээх чемпиона Гаврил Гаврильевич Колесов (Чурапчы), Аан дойду 4 төгүллээх чемпиона Николай Константинович Стручков (Дьокуускай), Аан дойду 2 төгүллээх чемпиона Андрей Егорович Федотов (Амма), билиҥҥи кэмҥэ дьахталларга  Аан дойду чемпионката Матрёна Степановна Ноговицына (Чурапчы), ону сэргэ гроссмейстердар Иван Августович Токусаров (Мэҥэ Хаҥалас), Николай Григорьевич Гуляев (Таатта).

Эр дьоҥҥо – 12, дьахталларга – 14 кыттааччылардаах оонньуулар күннэтэ салҕанан баран иһэллэр.

Ырытааччылар-көрөөччүлэр ис-истэриттэн сэҥээрэн, дуобат оонньуутун кистэлэҥнээх,  айымньылаах хаамылардаах, көһүтүүлээх-күүтүүлээх, эргиччи барытын сотон ылар албастардаах ньымаларын көрөн дуоһуйа оҥороллор.

Чемпионат түмүктэниэ үс туур хаалла.

Гаврил ВИНОКУРОВ, Бүтүн Россиятаааҕы категориялаах судьуйа, чемпионат кылаабынай судьуйата.

Добавить комментарий

Ваш адрес email не будет опубликован. Обязательные поля помечены *

186577
Бүгүн : 281