“Мүрү боотурдарын” кыайыылааҕа – Арсен Эверстов

Мүрү 1-кы нүөмэрдээх оскуолата​ сылын аайы улуустааҕы «Мүрү боотурдара» уол оҕолорго национальнай многоборьеҕа күрэхтэһии ыытар. Манна Уус Алдан күүстээх, быһый, сымса уолаттара мустан, бэйэлэрин кыахтарын, күүстэрин холоноллор.

Күрэхтэһии маннык түһүмэхтэртэн турар: Бэйэни билиһиннэрии, Үс төгүл үс, Тутум эргиир, Хапсаҕай, Мас тардыһыы, Өһөс торбос, Ыйааһыннаах хаамыы.

​Биһиги Лөгөйбүт оскуолатыттан икки уол: Эверстов Арсен, Сокорутов Арсен кыттыбыттара.

Быйылгы күрэх түмүгунэн кыайыылааҕынан уонна «Бадаар» маҕаһыынтан 20 тыһ. солкуобайга сертификат хаһаайынынан буолла – оскуолабыт киэн туттар уола, быйылгы выпускнига, араас күрэхтэһиилэр, конкурстар кыайыылаахтара Арсен Эверстов, тренерэ физкультура учуутала Карманов Александр Пантелеймонович.

Мин Арсены көрсөн кини спорка ситиһиилэрин туһунан маннык кэпсэттим:

— Арсен улахан кыайыыгынан эҕэрдэ! Саамай «Мүрү боотурдарыгар» эйиэхэ ыарахан түһүмэх ханнык буолла? Уонна саамай табыллан кыттыбыт түһүмэҕин?

— Илиим чэрэ баран, ыараханы көтөҕүүгэ, гиряны кыра баҕайы миэтэрэҕэ илдьибитим. Табыллыбыт түһүмэҕим – ыстаныы. Бэйэбэр личнай рекорд онорбутум, саамай табыллыбыт көрүҥүм ыстаныы дии саныыбын. Урут ыстаныыга наар бутэһик миэстэ буолар эбит буоллахпына, бу күрэххэ 2-с миэстэ буолбутум, бу табыллыы.

— Хас сааскыттан спордунан дьарыктанаҕын, бастакы спорт ханнык көрүҥэр кыттыбыккыный?

​- Спорка уопсайынан детсад эрдэхтэн кыралаан киирбитим,​ аҕам дьарыктыыр этэ. Алын сүһүөх кылааска бастаан 1-2 сыл Анатолий Ваисльевич Олесовка тустуунан дьарыктана сылдьыбытым.​ Ол кэннэ 5-8 кылааска Сергей Петрович Бурнашевка тустуубун салҕаабытым. 9-с кылааска Суоттуга Семён Гаврильевич Петуховка дьарыктана сылдьыбытым.​ Ити сыл​ многоборьены интириэһэргээн, салгыы Лөгөйгө кэлэн, күн бүгүҥҥэ диэри бу көрүҥүнэн утумнаахтык дьарыктанабын.

— Саамай ордорор көрүҥүн оччоҕо многоборье дуо? Спорт ханнык көрүҥэр өссө дьарыктанаҕын?

— Дьарыктанар көрүҥмүн многоборьены ордук сөбүлүүбүн.​ Уонна тустууну улахан күрэхтэри, табаарыстарым күрэхтэһиилэрин, ону таһынан легкай атлетиканы сэҥээрэн көрөбүн.

— Саамай улахан спорка ситиһииҥ?

— 2022сыллаахха Үөһээ Бүлүүгэ ыытыллыбыт Республикатааҕы Олоҥхо ыһыаҕар многоборьеҕа 2-с миэстэ буолбутум. Ол саамай улахан кыайыым дии саныыбын.

— Инникигэ, салгыы спорка былааныҥ?

— Многоборьенан өссө утумнаахтык, профессионально дьарыктаныам этэ.

— Спорт киһиэхэ туох көмө буоларый?

— Мин санаабар спорт эт-хаан эрэ өттүнэн буолбакка, киһи өйүн-санаатын дьаарыстыыр, сайыннарар.

— Саҥа саҕалааччыларга тугу баҕарыаҥ этэй?

— Баҕарыам этэ: тулууру, күүстээх санааны. Тулуура суох киһи спортсмен буолбат, санаатынан мөлтөх киһи миэстэлэспэт!

— Спортсмен хайдах буолуохтааҕый?

— Мин санаабар спортсмен ыраас өйдөөх-санаалаах буолуохтаах, бэйэтиттэн мөлтөх киһини атаҕастаабакка, бэйэтин кытта илдьэ сылдьан дьарыктыахтаах, өйүөхтээх. Уонна дисциплиналаах, бэрээдэктээх, бириэмэтин сөпкө туһанар киһи спортсмен буолар дии саныыбын.

— “Дети Азии” кытта ыҥырбыттара буоллар ханнык көрүҥҥэ кыттыаҥ этэй?

— Бэйэм тустууга сыһыаннаах буоламмын, хапсаҕай көрүҥэр боруобаланан көрүөм этэ.

— Арсен ыйытыыларбар эппиэттээбиккэр улахан Махтал! Оскуоланы бүтэрэр ЕГЭ-лэргин этэҥҥэ туттаран, оскуолабытын бүтэрэн, баҕарар үөрэххэр киирэргэр баҕарабын! Ситиһиилэри!

Павел ГЕРАСИМОВ, Лөгөй орто оскуолатын 6-с кылааһын үөрэнээччитэ.

Уус Алдан.