Сонуннар

Аан дойду чемпиона Александр Ефимовы чиэстээһин

Турция Кемер куоратыгар ыытыллан түмүктэммит доруобуйаларыгар хааччахтаах спортсменнар 100 харахтаах дуобакка аан дойду чемпионаттарыгар аналлаах пресс-конференция М.К. Аммосов аатынан Хотугулуу Илиҥҥи федеральнай университетыгар ыытылынна.

Тэрээһиҥҥэ ХИФУ ректора Анатолий Николаев, СР физическэй култуураҕа уонна спорка министрин солбуйааччы Гаврил Мохначевскай, СР дуобакка федерациятын салайааччы Яков Сидоров, республикатааҕы адаптивнай спорт киинин дириэктэрэ Ньургун Иванов уо.д.а. кыттыыны ыллылар.

Санатан эттэххэ, ыам ыйын 19-31 күннэригэр Турцияҕа доруобуйаларыгар хааччахтаах спортсменнар 100 харахтаах дуобакка 5-с аан дойдутааҕы чемпионаттарыгар биһиги биир дойдулаахпыт Александр Ефимов сүрүн оонньууга кыайыы көтөллөммүтэ, онтон түргэн оонньууга иккистээбитэ. Ону тэҥэ Сайыына Юнчанова эдэрдэргэ бастаабыта, Юлиана Андреева дьахталлар бөлөхтөрүгэр иккис миэстэни ылбыта. Манна даҕатан эттэххэ, Сайыыналаах Юлиана бу кэмҥэ соҕуруу үөрэтэр-эрчийэр түмсүүгэ сылдьар буоланнар, пресс-конференцияҕа кыттыбатылар.

Бэйэтин иитиллээччитэ А.Ефимов чемпионакка кыттыытын туһунан адаптивнай спорт киинин тренерэ, гроссмейстер Петр Ушницкай иһитиннэрдэ. Онтон аан дойду чемпиона, биһиги биллиилээх спортсмеммыт Матрена Ноговицына – Александр партияларын ырытта.

Бэлиэ күҥҥэ сөп түбэһиннэрэн, Гаврил Мохначевскай – чемпионакка ситиһиилээхтик кыттыбыт Александр Ефимовка уонна кини тренерэ Петр Ушницкайга харчынан наҕараадаланалларын туһунан туоһу суруктары туттарда.

Ити курдук, пресс-конференция кыттыылаахтара спортсмены эҕэрдэлээтилэр, ыйытыылары биэрэн – сөптөөх хоруйдары ыллылар, салгыы ситиһиилэри баҕардылар.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

136655
Бүгүн : 164