Василий Егоров рингэҕэ ыам ыйын 4 күнүгэр тахсыаҕа

Бу күннэргэ Узбекистан Республикатын киин куоратыгар – Ташкеҥҥа, эр дьоҥҥо боксаҕа аан дойду чемпионата саҕаланна. Чемпионакка 107 дойдуттан 500-чэкэ боксер күөн көрсөр. Кинилэр 13 ыйааһыҥҥа ким чемпион буоларын быһаарсыахтара.

Маннык улахан таһымнаах күрэхтэһиигэ саха спордун бэрэстэбиитэлэ, саха боксаҕа кыһатын иитиллээччитэ – Европа 2, Россия 5 төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров Россия чиэһин көмүскээн күрэс былдьаһара кэрэхсэбиллээх. Бу түгэн, Саха сирин боксата билигин даҕаны улахан таһымҥа турарын туоһулуур диэххэ сөп.

Уолбут кыттар 51 кг ыйааһыҥҥа киирсиилэрэ – ыам ыйын 4 күнүттэн саҕаланар. Бу киилэҕэ барыта 43 боксер баар. Кинилэр сэрэбиэй быһыытынан икки бөлөххө хайдыһан киирсэллэр. Василий Егоров бастаан, финал 32/1-гэр турок Самет Гюмюһу кытта киирсэр. Турок – былырыын 22-гэр диэри саастаахтарга Европа күрэхтэһиитин кыайыылааҕа. Бу киирсии кыайыылааҕа салгыы, ыам ыйын 7 күнүгэр финал 16/1-гэр аан дойду чемпиона Томоя Цубоины (Япония) кытта көрсүөҕэ. Манна, Гюмюш уонна Цубои ити ситиһиилэрин 54 киилэҕэ кыттан ситиспиттэрин санатар тоҕоостоох дии саныыбын. Ол аата, кинилэр кырата суох ыйааһыны түһэринэн кытталлар.

Онтон салгыы, сылыктаан көрдөххө, рингэ хаһаайына, олимпийскай чемпион Хасанбой Дусматовы, эбэтэр кубинец Ромеро Рейеһы кытта киирсиэн сөп.

Манна даҕатан, билиҥҥи күҥҥэ 51 киилэҕэ аан дойду боксаҕа федерациятын рейтинин билиһиннэрдэххэ маннык: 1. Сакен Бибосинов (Казахстан), 2. Арон Хилл (АХШ), 3. Мартин Сальвадор Молина (Испания), 4. Саид Мортажи (Марокко), 5. Юбержен Мартинес (Колумбия), 6. Федерико Серра (Италия), 7. Мохаммед Эламин (Алжир), 8. Максуд Юсуфзада (Азербайджан), 9-12. Ахтем Закиров (Россия), Хасанбой Дусматов (Узбекистан), Танарат Саенгпнет (Таиланд), Риоми Танака (Япония)…

Сэрэбиэй сеткатыттан көрдөххө, төһө даҕаны АХШ баһылыктаах кэккэ дойдулар бу чемпионакка кэлбэтэхтэрин үрдүнэн, састаап лаппа күүстээх. Этэргэ дылы, аан дойду чемпионатыгар мөлтөх киһи кыттыбат. Бары утарсааччылар – бары күүстээхтэр. Бу түгэҥҥэ кыайыылааҕы рингэ быһаарыа диибит. Манна урукку аат-суол, ситиһии ааҕыллыбат. Ким бу күҥҥэ, бу чааска үчүгэй бэлэмнээх, кыайыыга дьулуурдаах – ол кыайыаҕа.

Оттон биһиги ханнык даҕаны түгэҥҥэ бэйэбит уолбутугар ыалдьабыт. Василий, кытаат!

Петр ПАВЛОВ.