Сонуннар

Тириэньэр Гаврил Дмитриев иитиллээччилэрэ күрэхтэһэн кэллилэр

Эдэр бөҕөстөрбүт араас таһымнаах күрэхтэһиилэргэ элбэхтик кыттар, улахан көбүөрдэргэ үгүстүк тахсар буоллахтарына – үүнүөхтэрэ, эбиллиэхтэрэ. Бу сырыыга Саха Өрөспүүбүлүкэтин физическэй культураҕа уонна спорка үтүөлээх үлэһитэ, Хаҥалас улууһун Оҕо спортивнай оскуолатын көҥүл тустууга тириэньэрэ Гаврил Дмитриев, иитиллээччилэрэ бу соторутааҕыта кыттыбыт күрэхтэһиилэрин туһунан бу курдук кэпсээтэ:          

– Быйыл муус устар 25 күнүттэн ыам ыйын 7 күнүгэр диэри Владикавказ куоракка 16 саастарыгар диэри Арассыыйаҕа бастыыр иһин күрэхтэһиигэ бэлэмнэнэн эрчийэр-үөрэтэр түмсүүгэ эдэр бөҕөстөрү илдьэ сырыттым. Күрэхтэһиибит ыам ыйын 10-13 күннэригэр Тула куоракка ыытылынна. Биһиги улууспутуттан үс оҕо кыттыыны ылла. 52 кг – Кононов Арылхан (VIII кылаас үөрэнээччитэ, билигин Чурапчыга үөрэнэр), 85 кг ыйааһыҥҥа икки уолбут Егоров Рома (II Дьөппөн, VIII кылаас үөрэнээччитэ) уонна Кривошапкин Айхан (Нөмүгү, VII кылаас үөрэнээччитэ) туһуннулар.

Бу сырыыга Кривошапкин Айхан бастакы эргииргэ Брянскай уобалас тустуугун А.Степченконы 10:0 кыайбыта. Иккис эргииргэ 5:6-ҕа очукуонан  Дагестан бөҕөһүгэр Яхьяев Магомедка бэрт кыранан сабырыйтарда. Магомед «уоскутар” бөлөххө тустан кыайан, түмүккэ боруонса мэтээл хаһаайынынан буолла. Киһи кыайар да кыайтарар да, уолбут кыайыыга баҕата улахан этэ, бу сырыыга тэҥ тыҥааһыннаах киирсиигэ хоттордор да үчүгэй тустууну көрдөрдө. Айхан салгыы былааннаахтык эрчилиннэҕинэ, күүстээх уолаттардыын тэҥҥэ тустар кыахтааҕын дакаастаата.

Бу күрэхтэһиигэ бэлэмнэниигэ икки сиринэн сылдьан эрчилиннибит. Улахан ыйааһыннаах уолаттар Хотугу Осетия Владикавказ куоратыгар, ол иһигэр мин уолаттарбынаан СӨ уолаттарга ыстаарсай тириэньэрэ, норуоттар икки ардыларынааҕы кылаастаах спорт маастара Кузьма Сивцевтиин онно уолаттары дьарыктаатыбыт. Онтон 52 кг ыйааһынтан кыра уолаттары Дагестан киин куоратыгар Махачкалаҕа, тириэньэрдэр Степан Скрябин (Амма улууһа) уонна Николай Яковлев (Дьокуускай к.) онтон да атын тириэньэрдэр илдьэ сырыттылар, эрчийдилэр.

Арассыыйаҕа бастыыр иһин күрэхтэһиигэ биэс оҕо (1 оҕо Хаҥалас уонна 4 Нам улууһун бөҕөстөрө) киирбэккэ хаалбыттара. Бу оҕолору ыам ыйын 12-13 күннэригэр Смоленскай куоракка ыытыллыбыт оҕолорго «Көмүс борцовка» диэн Гран-при норуоттар икки ардыларынааҕы турнирга кытыннардым. Ааттаах-суоллаах  улахан турнирга 48 кг ыйааһыннаах бөҕөстөргө киэн туттар биир дойдулаахпыт, СӨ спорка миниистирэ  Леонид Спиридонов аатынан тустуу оскуолатын иитиллээччитэ Иванов Леня (Нөмүгү) үһүс бочуоттаах миэстэҕэ боруонса мэтээли түөһүгэр кэттэ. Нам улууһуттан аатырбыт тустуук, Арассыыйа спордун үтүөлээх маастара Петр Юмшанов аатынан тустуу оскуолатын иитиллээччилэрэ 46 кг – Саян Федоров, 48 кг – Богдан Петров үрүҥ көмүс мэтээллэри ылары ситистилэр. Оттон 57 кг – Павел Стручков V миэстэ буолла.

Салгыы, Москва куоракка Саха сирин эдэр бөҕөстөрө, Москва уобалаһа уонна ити эргинээҕи Оҕо спортивнай оскуолаларын эдэр бөҕөстөрө кыттыылаах матчевай көрсүһүүгэ 57 кг – Кононов Арылхан, 85 кг – Кривошапкин Айхан тустаннар, хамаанданан үһүс бириистээх миэстэҕэ таҕыстылар.

Бу күрэхтэһиилэргэ сылдьарбытыгар, сүрүннээн Хаҥаластааҕы Оҕо спортивнай оскуолатын салалтата (дириэктэр Николай Иванов) эрчийэр-үөрэтэр түмсүүгэ аһылыкпытын, олорор сирбитин  үбүлээтэ. Онтон айаммыт ороскуотун улуус спорка уонна физическэй культураҕа салаата (салайааччы Виктор Громов) толуйда. Итини таһынан кэлиҥҥи үөрэтэр-эрчийэр түмсүү сэттэ күнүн бары ороскуотун уонна барыыбытын-кэлиибитин NHZ Group Нөмүгүтээҕи килиэп собуотун генеральнай дириэктэрэ Вячеслав Нестеров үбүлээн улаханнык көмөлөстүлэр, өйөбүлү оҥордулар онон олус улаханнык махтанабыт, – диэтэ тириэньэр Гаврил Дмитриевич.

Тириэньэрдэр кэскиллээх бөҕөстөрү кыайыыга эрэллээх буолууга күүстээх өйдөрүн, кытаанах санааларын саргылыыллар.  Тустуук тус уратытын аахсан, онтуката сөптөөх хайысханан муҥутуурдук сайдарыгар көмөлөһөн, оҕону кыра эрдэҕиттэн иитэн-такайан, буһаран-хатаран, эт-хаан өртүнэн эрчийэн, тулуурдаах  туруорбут соругун ситиһэргэ дьүккүөрдээх, кыайыгас-хотугас, хотоойу санаалаах бөҕөс буоларыгар олук  уураллар.

Уйбаан УЙГУУРАП. Покровскай.

PS: Хаартыскалар тириэньэр Г.Д. Дмитриев архыыбыттан туһанылыннылар.

 

 

Добавить комментарий

Ваш адрес email не будет опубликован. Обязательные поля помечены *

176512
Бүгүн : 78