Сонуннар

Сарсыардааҥҥы сэрээккэҕэ ыҥырабыт!

Республикаҕа сарсыардааҥҥы эти-хааны чэбдигирдэр эрчиллиилэр саҕаланнылар. Бүгүн Дьокуускай куорат Кыайыы болуоссатыгар сарсыарда 07 чаас 30 мүн – сарсыардааҥҥы эрчиллиини үөрүүлээхтик саҕалааһын буолла.

Бэлиэ түгэҥҥэ – Саха сиригэр физическэй култуура тэнийбитэ 100 сылынан республикаҕа физическэй култуура уонна маассабай спорт сайдыытыгар кылааттарын уонна чөл, чэгиэн-чэбдик олоҕу киэҥник тарҕатыыга көмөлөрүн иһин Саха Республикатын физическэй култуураҕа уонна спорка министиэристибэтин махтал суруктара итиэннэ өйдөбүнньүк бэлэхтэрэ – Аркадий Тихонович Прокопьевка, Василий Миронович Самсоновка, Маргарита Григорьевна Куличкинаҕа туттарылынна.

Манна даҕатан эттэххэ, Маргарита Григорьевна бүгүн төрөөбүт күнэ, кини 83 сааһын туолла. Опыттаах инструкторы, спорт энтузиаһын, Саха Республикатын физическэй култуураҕа уонна спорка үтүөлээх үлэһитин биир санаалаахтара истиҥник эҕэрдэлээтилэр.

Кыайыы болуоссатыгар бүгүҥҥү, сарсыардааҥҥы эрчиллиини оҕунан ытыыга РФ спордун маастара, СР физическэй култуураҕа уонна маассабай спорка управлениетын инструктора Полина Абрамова салайан ыытта.

Куорат олохтоохторун бука барыгытын сарсыардааҥҥы сэрээккэлэргэ көхтөөхтүк кыттаргытыгар, эккитин-хааҥҥытын чэбдигирдэргитигэр ыҥырабыт!

«Дьулурҕан».

Добавить комментарий

Ваш адрес email не будет опубликован. Обязательные поля помечены *

201700
Бүгүн : 416