Сонуннар

Көбүөргэ тохпут көмүс көлөһүннэрэ тилиннэ

Саха сирэ чахчы – тустуулаах сиринэн биллэр. Этэргэ дылы, тустуута суох – саха суох, сахата суох – тустуу суох. Тустуу биһиги хааммытыгар баар. Ол үгэс билигин даҕаны салҕанан бара турара кэрэхсэбиллээх. Оҕолортон саҕалаан аҕам саастаахтарга тиийэ биһиги бөҕөстөрбүт көҥүл тустуу араас таһымнаах күрэхтэһиилэригэр үрдүк кирбиилэри ылан, Сахаларын сирин аатырдаллар.  

ХИФУ профессора, ССРС спордун маастара, Саха АССР үтүөлээх тренерэ Николай Кириллович Алексеев – Матбор сырдык аатыгар көҥүл тустууга республика 2023 сыллааҕы аҕам саастаахтарга чемпионатын үөрүүлээх аһыллыыта – ураты кэрэ бэлиэ түгэни тосхойдо. Кэккэ сылларга Россия, аан дойду чемпионаттарыгар ситиһиилээхтик кыттыбыт бэтэрээн тустууктарга Россия бэтэрээннэргэ спордун маастардара буолбуттарын туоһулуур анал бэлиэлэр уонна дастабырыанньалар үөрүүлээх быһыыга-майгыга туттарылыннылар.

Россия спортивнай тустууга федерациятын, бу общественнай тэрилтэ салайааччыта М.Г. Мамиашвили илии батааһыннаах бэлиэлэрин уонна дастабырыанньаларын Саха Республикатын физическэй культураҕа уонна спорка министрэ Леонид Спиридонов дохсун ытыс тыаһын ортотугар туттартаата.

Ол курдук, “Россия бэтэрээннэргэ норуоттар икки ардыларынааҕы кылаастаах маастара” бэлиэлэр бэтэрээн-маастардарга аан дойду чемпионнара Василий Николаевич Алексеевка, Ефрем Михайлович Ефремовка, Семен Прокопьевич Соркомовка туттарылынна.

Оттон “Россия бэтэрээннэргэ спордун маастара” ааттар – аан дойду уонна Россия бэтэрээннэргэ күрэхтэһиитигэр бастаабыт уонна миэстэлэспит Федот Архипович Соловьевка, Иннокентий Семенович Кочкиҥҥа, Василий Романович Пахомовка, Николай Титович Григорьевка, Вадим Петрович Даниловка, Герасим Николаевич Дьяконовка, Сергей Егорович Ноговицыҥҥа ананна.

Олохторун спорка, чуолаан көҥүл тустууга анаабыт, көбүөргэ көмус көлөһүннэрин тохпут, били оҕо эрдэхтэриттэн саҕалаабыт тустууларын, эрчиллиилэрин тохтопокко, бэйэлэрин кыахтарынан күрэхтэһиилэргэ кыттыбыт, үтүө холобурдарынан атыттары батыһыннарбыт дьон сыаллара-соруктара тилиннэ диэххэ сөп.

Наҕараадаламмыт бөҕөстөрбүтүн эҕэрдэлиибит!

Петр Павлов.

Ааптар хаартыскаҕа түһэриилэрэ.   

 

 

Добавить комментарий

Ваш адрес email не будет опубликован. Обязательные поля помечены *

176520
Бүгүн : 86