Сонуннар

Хомойуох иһин, хотторуу

Ташкеҥҥа ыытылла турар боксаҕа аан дойду чемпионатыгар бүгүн 51 кг ыйааһыннаахтарга финал 16/1-гэр киирсиилэр буоллулар.

Биһиги уолбут, Россия 5, Европа 2 төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров – аан дойду 2021 сыллааҕы 54 киилэҕэ чемпиона японец Томоя Цубоилыын көрүстэ.

Киирсии хара ааныттан бэрт түргэн тэтимнээхтик, боксердар хардары-таары сытыы охсуулаах ыытылынна. Омос көрдөххө, хайалара да оччо баһыйара биллибэт, тэҥ киирсиитэ буолла. Японец өссө төлө куота сырытта. Ол эрээри, судьуйалар кыайыыны 4:1 ахсаанынан киниэхэ биэрдилэр.

Цубои рингэҕэ киириэҕиттэн наһаа холкутук, ардыгар күлэ-үөрэ, араастаан ыстаҥалыы сылдьан кииристэ. Итиэннэ хас раунд бүттэҕин ахсын, баһыйбытын биллэрэн, илиитин өрө уунна. Ол көстүү судьуйаларга быһаарыылаах буолбут буолуон эмиэ сөп.

Онон хайыахпытый, хотторуу…

Спорт аата – спорт буоллаҕа, ким эрэ кыайыахтаах, ким эрэ хотторуохтаах. Аан дойду чемпионатыгар саха киһитэ кыттыбыта бэйэтэ бэлиэ түгэн. Уолбут киирсиитин спорт, бокса специалистара, тренердэр сөптөөхтүк быһаарыахтара, инники соруктары туруоруохтара дии саныыбын.

PS: Василий Егоров – Томоя Цубои киирсиилэрин видеотын Телеграмҥа “Дьулурҕан” каналыгар көрүөххүтүн сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

176534
Бүгүн : 100