Сонуннар

Биһигини кытта тэҥҥэ хаамсыҥ!

// Биир дойдулаахпыт, профессор Георгий Прокопьевич Башарин тус холобурун утумнаан

«Пандемия доруобуйабын айгыратта…», «Кэлин ыарытыйар буоллум…», «Тыыным кыараабыт курдук, сүүрдэхпинэ аҕылыыр буолбуппун…» диэн дьону кытта кэпсэтэрбэр элбэхтик истэбин. Ол аата, кырдьык, тыҥабыт, эппит-хааммыт уларыйбыт эбит диэн санааҕа кэллибит.

Ол иһин профессор Г.П. Башарин аатынан Сылаҥ орто оскуолатын 5-с кылааһын үөрэнээччилэрэ ыам ыйын 23 күнүгэр сонун «PRO-движение 1.0” ЧЕЛЛЕНДЖ сүрэхтээтилэр уонна күн ахсын уһун дистанцияҕа хаамыыга, чөл куттаах буолууга угуйар тэрээһиҥҥэ дьону көҕүлээн түмтүлэр.

Ытыктыыр, сүгүрүйэр профессорбыт – Георгий Прокопьевич Башарин, сахалартан бастакы историческай наука дуоктара, А.Е. Кулаковскай аатынан бириэмийэ бастакы лауреата, РФ, СӨ наукаларын үтүөлээх диэйэтэлэ.

Кини тус бэйэтэ чөл олоҕу инники күөҥҥэ тутан, сэллик ыарыыны кыайбыт киһи буоларын билэбит. Үөрэнээччилэр ити холобур билиҥҥи кэмҥэ тоҕоостооҕун таба өйдөөн, бу бырайыак олоххо киирдэ. Георгий Прокопьевич тыҥатыгар 12 эппэрээссийэни ааспыт. Кини ол кэннэ утумнаахтык хаамыынан, хайыһарынан дьарыктанан, сэллик ыарыыны кыайбыт. Ол туһунан төрөппүт уола медицинскэй наука дуоктара, чөл олох пропагандиһа Карл Георгиевич Башарин кэпсээбитэ.

Биһиги аныгылыы ааттаах Челленджпит сыала – 75 тыһыынча хардыыны оҥорбут киһи финалист испиэһэгэр киирэр. Финалистарга эрэ сыаналаах бириистэр оонньоноллор. Бу аата, дьоҥҥо оонньуу нөҥүө чөл, чэгиэн  олох үөрүйэхтэрин олохсутуу.

Номнуо, Телеграм ситимҥэ, күннэтэ, 40-чэ киһи  хаамыыга тус көрдөрүүтүн  ыытар. Кыттааччыларбыт 42% орто саастаахтар, 16% 20-лэригэр диэри, 21%  50 саастарыттан үөһээ. Бу саҥа саҕалааһыҥҥа бэртээхэй көрдөрүү!

Биһиги хамсааһыммытыгар  Саха сирин араас улууһуттан: Чурапчы, Эдьигээн, Кэбээйи, Уус-Алдан, Дьокуускай куорат – биһигини кытта сэргэстэһэ хаамар. Өссө да эбиллэн иһэрбит үөрдэр.

Чөл куттаах буолуҥ, чэгиэн-чэбдик олохтоох буолуҥ, тэҥҥэ биһигини кытта хаамсыҥ, QR-кодунан сирдэтэн – ситиммитигэр холбоһуҥ!

Бэһис кылаас үөрэнээччилэрэ уонна салайааччы Зинаида Петровна ДЬЯЧКОВСКАЯ.

Чурапчы, Сылаҥ.

Добавить комментарий

Ваш адрес email не будет опубликован. Обязательные поля помечены *

161084
Бүгүн : 138