Бэтэрээн бөҕөстөр хапсыстылар

Быйыл, ХИФУ профессора, көҥүл тустууга ССРС спордун маастара, Саха АССР үтүөлээх тренерэ Николай Кириллович Алексеев – Матбор сырдык аатыгар аҕам саастаах тустууктар республикаҕа бастыыр иһин күрэхтэһиилэрэ ыам ыйын 20 күнүгэр ыытылынна.

Төҕө да өрүс мууһа хамсааһынынан сырыы-айан ыараабытын үрдүнэн көбүөргэ – Амма, Уус Алдан, Үөһээ Бүлүү, Булуҥ, Нам, Сунтаар, Таатта, Хаҥалас, Кэбээйи, Мэҥэ Хаҥалас улуустарыттан уонна Дьокуускай куораттан барыта 37 бөҕөс тахсан күөн көрүстэ. Кинилэр, бэйэлэрин саастарынан бөлөхтөргө арахсан туһуннулар.

Бастатан туран, кыттааччылар бары оҕо эрдэхтэриттэн тустуунан дьарыктаммыт, сорохторо улахан көбүөргэ улахан ситиһиилэммит дьон. Кинилэр, билиҥҥи кэмҥэ туох ханнык таһымҥа сылдьалларын тургутан көрдүлэр. Түһүлгэ саамай улахан ааттаах-суоллаах кыттааччыларынан Россия эр дьоҥҥо чемпиона Прокопий Петров, аан дойду бэтэрээн-маастардарга чемпиона Ефрем Ефремов, бэтэрээннэргэ Россия чемпиона, аан дойду призера Вадим Данилов, Сурдлимпиада призера Егор Скрябин, биллиилээх бөҕөс Платон Саввинов, хапсаҕай маастардара Василий Уйгуров, Василий Оконешников, Николай Григорьев уо.д.а. буоллулар.

Биһиги кинилэргэ махтаныах тустаахпыт – билиҥҥэ диэри тустууга тапталларын уҕарыппакка, бэйэлэринэн көбүөргэ тахсан, эдэр саастарын эргитэ санаан күрэхтэһэн ылбыттарыгар, атыттарга холобур буолбуттарыгар.

Чемпионат бэлиэ түгэнинэн биллэн турар, кэккэ сылларга Россия, аан дойду чемпионаттарыгар ситиһиилээхтик кыттыбыт бэтэрээн тустууктарга – Россия бэтэрээннэргэ спордун маастардара буолбуттарын туоһулуур анал бэлиэлэр уонна дастабырыанньалар үөрүүлээх быһыыга-майгыга туттарыы буолла.

Бэлиэ түгэҥҥэ СР физическэй культураҕа уонна спорка министрэ Леонид Спиридонов, Саха сирин спорка тэрилтэтин салайааччытынан үлэлии сылдьыбыт Афанасий Алексеев, республика тустууга федерациятын бэрэссэдээтэлинэн үлэлээбит Макар Яковлев, куорат 3 №-дээх спортивнай оскуолатын дириэктэрэ Василий Уйгуров, бу оскуола бочуоттаах дириэктэрэ Федот Соловьев, чемпионат кылаабынай судьуйата Станислав Афанасьев кыттыыны ылан, аҕам саастаах бөҕөстөрү эҕэрдэлээтилэр.

Тустууктар чугас доҕордоро, биллиилээх ырыаһыт Владимир Татаринов ылбаҕай ырыанан эҕэрдэлээтэ. Оттон маннык бэлиэ түгэҥҥэ үгэс быһыытынан оһуохай тэриллибитигэр, 89 саастаах спорт бэтэрээнэ Афанасий Егорович Алексеев оһуохай тылын таһааран, мустубут дьон хоннох-хоннохторуттан ылсан төгүрүччү хаамсыыларын көҕүлээтэ.

Күрэхтэһии этэҥҥэ түмүктэннэ. Тэрийээччилэргэ, Дьокуускай куорат тустууга федерациятыгар, В.П. Керемясов аатынан куорат 3 №-дээх спортивнай оскуола коллективыгар – махтал!

Ол да буоллар, буолан ааспытын кэннэ эттэххэ, бу күрэхтэһиини саас эрдэ, суол-иис баар кэмигэр тэрийэн ыыппыт киһи, өссө элбэх кыттааччы буолуо этэ. Састаап да өртүнэн лаппа күүстээх буолуо этэ. Инникитин итини учуоттуулларыгар баҕарыллар. Сэрэйдэххэ, хааттарыыга түбэһэн кыттыбакка хаалбыт дьон муҥатыйар буолуохтаахтар. Бу чемпионат балаһыанньатын быһыытынан бэс ыйын 6-9 күннэригэр Смоленскайга буолар Россия көҥүл тустууга бэтэрээннэргэ чемпионатыгар кыттааччылары сүүмэрдиир сыаллаах-соруктаах этэ.

Санатан эттэххэ, былырыын Каспийскайга ыытыллыбыт чемпионакка Саха сирин хамаандата эриэ-дэхси көрдөрүүлэммитэ, кыттааччылар бары кэриэтэ илии тутуурдаах, өттүк харалаах кэлбиттэрэ. Бу да сырыыга республика аатын-суолун түһэн биэрбэт бөҕөстөр кыттарга суоттана бэлэмнэнэн сылдьар буолуохтаахтар.

PS: Чемпионат түмүк көрдөрүүтүн, Смоленскайга ыытыллыахтаах Россия чемпионатын программатын dzulurgan.ru сайтка таһааран турабыт, ону онон хатылыы барбаппыт. Ону тэҥэ чемпионат биирдиилээн хапсыһыылара Дьулурҕан ютуб каналыгар уһуллан таһаарыллыбыта https://www.youtube.com/channel/UCdQWiPUliiKpPOVV3JKN. Ону көрүөххүтүн сөп.

Петр ПАВЛОВ.

Ааптар хаартыскаҕа түһэриилэрэ.