Тустууну таптааччыларга дьоһун бэлэх

Дьэ, муус устар 13-17 күннэригэр биһиги республикабыт киин куоратын «Өрөгөй» Спорка бэлэмнэнии киинигэр 21-гэр диэри саастаах бөҕөстөр Россияҕа бастыыр иһин күрэхтэһиилэрэ ыытыллара бу кэллэ.

Бу күрэхтэһии бастакы былаанынан Калининград куоракка буолуохтааҕа. Ону анараалар аккаастааннар, Россия спортивнай тустууга федерацията Саха сиригэр ыытарга итэҕэйдэ. Маныаха бастатан туран, республика баһылыга, спортивнай тустуу федерациятын салайааччыта Айсен Николаев өйөбүлэ быһаарыылаах буолла. Күрэхтэһии, Саха сиригэр физическэй культура уонна спорт 100 сыллаах үбүлүөйүгэр – тустууну таптааччыларга дьоһун бэлэх диэххэ сөп.

Бу улахан түһүлгэҕэ киэҥ Россия 40 регионуттан бастыҥтан бастыҥнар талыллан кэлэн кыттыахтара. Оттон Саха сирин чиэһин 36 бөҕөс көмүскүө. Кинилэр бу күрэхтэһиигэ бэлэмнэнэн үс түһүмэхтээх анал үөрэтэр-эрчийэр түмсүүнү аастылар. Ол иһигэр олимпийскай чемпион Роман Дмитриев кэриэһигэр норуоттар икки ардыларынааҕы турнирга кытыннылар.

Санатан эттэххэ, маннык күрэхтэһии Дьокуускайга 17 сыл буолан баран иккистээн эргилиннэ. Ол курдук, 2006 сыллаахха маннык күрэхтэһии «Кыайыы 50 сыла» Спорт дыбарыаһыгар буолбута. Онно биир дойдулаахтарбытыттан Виктор Лебедев, Николай Аянитов бастакы, Иннокентий Иннокентьев иккис, Роберт Окороков, Денис Дормидонтов, Тимур Пестерев үһүс миэстэлэри ылары ситиспиттэрэ.

Күрэхтэһиигэ киирии – босхо! Онон спорду таптааччылар, тустууну сэҥээрээччилэр бука бары тутуспутунан күргүөмүнэн “Өрөгөйгө” кэлэн хапсыһыылары илэ хараххытынан көрөргүтүгэр, бэйэбит уолаттарбытыгар ыалдьаргытыгар, кинилэргэ күүстэригэр күүс, кыахтарыгар кыах биэрэргитигэр, Саха сиригэр көҥүл тустуу биһирэнэрин көрдөрөргүтүгэр баҕарабыт.

Петр ПАВЛОВ.