Спорт эйгэтигэр биир умнуллубат тэрээһин

Аан дойду спордун күнүн кытта алтыһа биһиги, Роман Михайлович Дмитриев аатынан Олимпийскай эрэл училищетын студеннара XX үйэ уһулуччулаах тренерэ Дмитрий Петрович Коркин 95 сааһыгар анаммыт «Куоркун ааҕыылара» республикатааҕы научнай-практическай конференцияҕа кыттыыны ылан кэллибит.

Улуу тренер иитиллээччитэ Семен Морфуновтуун билистибит, кини 1968 сыллаахха ССРС оҕолорго чемпиона. Семен Семенович олус кэрэхсэбиллээхтик, Дмитрий Петрович Коркин туһунан элбэҕи кэпсээтэ. Ордук чорботон учуутал быһыытынан ирдэбиллээҕин, дьиэтээҕи үлэни хонтуруоллуурун сөҕө иһиттибит. Тренер быһыытынан чопчу болдьообут бириэмэни тутуһууну, дьарыкка эппиэтинэстээх, сыаллаах-соруктаах үлэни тэрийэрин, хас биирдии оҕону кытта ыкса үлэлиирин тоһоҕолоон эттэ. Дмитрий Петрович үөрэҕи уонна дьарыгы тэҥник көрөрүн, болҕомтоҕо уурарын, ону таһынан үгүс үчүгэй көрүдьүөстээх түгэннэри иһиттибит. Тренер үлэтин таһынан профсоюз председателинэн үлэлээбит.

Д.П. Коркин коллективын кытта тэҥҥэ бииргэ үлэлээн, уон икки сыл устата борустуой саха тыа уолаттарын дьарыктаан, Олимпа чыпчаалыгар таһаарбытын аан дойдуга ураты оскуоланы тэрийбитин уонна билигин даҕаны киэн далааһыннаахтык үлэлии олорор спортивнай түөлбэни кытта ыкса билистибит.

Конференцияҕа биһиги устудьуоннарбыт ситиһиилээхтик кытыннылар. Дакылаакка 1-кы миэстэни Олеся Трифонова, 1-кы курс студена (салайааччы С.М. Никифорова). Ксения Леханова, 4-с курс студена биһирэбил ылла (салайааччы Р.А. Адамова). Нуучча тылын олимпиадатыгар Лобашев Али, 1-кы курс студена иккис миэстэ (салайааччы М.В. Капитонова). Интеллектуальнай оонньууга Кирилл Дорожкин иккис миэстэ, төрдүс миэстэни Юмшанов Ньургун. Тестированиеҕа үрдүк баалы Максимов Саид, Маркова Юлия, 4-с курс студеннара ыллылар (салайааччы Никифорова С.М.).

Практикабыт чэрчитинэн Д.П. Коркин аатынан Албан аат музейын көрдүбүт. Хас биирдии иитиллээччи күрэхтэһии кэнниттэн ырытыыларын сөбүлээн аахтыбыт. Сылдьыбыт ыалдьыттар ахтыыларын, сатабыллаах тренер наукаҕа сыһыаран ыыппыт бэйэ илиитинэн суруллубут докумуоннарын, чинчийиилэрин бэлиэтии көрдүбүт. Баай экспонаттаах, олус туһалаах музей үлэтин биһиэхэ А.И. Спиридонова билиһиннэрдэ.

Күммүт иккис аҥарыгар Чурапчытааҕы федеральнай государственнай физкультура уонна спорт институтун үлэтин кытта билистибит. Сырдык, аныгы ирдэбилинэн толору хааччыллыылаах институту сэргээтибит. Институт ректора Иннокентий Иннокентьевичтыын олус истиҥ кэпсэтии ааста. Ону таһынан массажка, бэйэ туругун анал “Омега” аппараакка чинчийиини аастыбыт.  Спортсменнарга туһаайыллыбыт массаж оҥорорго үөрэннибит. Устудьуоннары кытта билистибит, наһаа тэрээһиннээх көрсүһүү, оонньууттан дуоһуйдубут. Түмүккэ училище оҕолорун кытта волейбол оонньоотубут, сэргэхсийдибит.

Бириэмэни да билбэккэ күммүтүн олус туһалаахтык атаардыбыт. Саҥаны биллибит, араас тургутууну аастыбыт. Ол быыһыгар тото-хана аһаатыбыт, тэҥнээхтэрбитин кытта билистибит, оонньоон да ыллыбыт. Улахан махталбытын тириэрдэбит институт (ректор И.И. Готовцев) уонна оскуола коллективыгар (дириэктэр э.т. С.А. Захаров) уонна кураторбытыгар М.Я. Оконешниковаҕа.

Практика быыһыгар студент олоҕун сэргэхситэр сонун тэрээһиҥҥэ бэлэмнэнэн, кыттан, саҥа үөрүйэхтэри ылынан, олоххо киллэрэн астынан туран училище дириэктэригэр С.С. Чердоновка, үөрэх чааһыгар солбуйааччыга П.Ю. Протодьяконовка, практикабыт салайааччытыгар С.М. Никифороваҕа махталбытын тиэрдэбит.

4-с курс студеннарын ааттарыттан Юлия МАРКОВА.