Сонуннар

Республикатааҕы Аҕа уолунаан күрэхтэһиитэ саҕаланна

Муус устар 6-7 күннэригэр Таатта улууһун Дьүлэй нэһилиэгэр номнуо 23-с төгүлүн аҕа уолунаан республикатааҕы күрэхтэһиитэ ыытылла турар. Манна 16 улуустан (Амматтан, Үөһээ Бүлүүттэн, Бүлүүттэн, Горнайтан, Ленскэйтэн, Мэҥэ Хаҥаластан, Намтан, Ньурбаттан, Өлүөхүмэттэн, Сунтаартан, Тааттаттан, Томпоттон, Уус Алдантан, Хаҥаластан, Чурапчыттан, Дьокуускайтан) барыта 18 хамаанда мустан кыттыыны ыла сылдьар.

Кинилэргэ көх-нэм буола элбэх делегациялар кэлэн, бэйэлэрин дьоннорун кыайыыга кынаттыы сылдьалларын көрөр кэрэхсэбиллээх. Балаһыанньа быһыытынан уолаттар 14-гэр диэри саастаах буолуохтаахтар. Ыйыталаһан биллэххэ, хаһыс да төгүлүн кытта сылдьар кыайыыга дьулуурдаах аҕалар бааллар эбит.

Бэйэни билиһиннэриини кытта сэттэ түһүмэҕинэн күрэхтэһэллэр. Ол курдук, бэйэни билиһиннэрии, ойбон алларыы, уот оттон чэй оргутуу, бэрэбинэни суоруу, эрбэтии, хайытыы, саһааннааһын, быйыл саҥа киллэриллибит хайыһарынан сүүрүү, остуолбаҕа ыттыы. Ону барытын судьуйалыыр коллегия кыраҕытык кэтээн көрөн дьүүллүүр, сыаналыыр.

Күрэхтэһии үөрүүлээхтик аһыллыытыгар Таатта улууһун культураҕа управлениетын үлэһиттэрэ, Дьүлэй нэһилиэгин оскуолатын ансамбллара кыттыыны ыллылар. Ону тэҥэ бэлиэ түгэҥҥэ СР үлэҕэ уонна социальнай сайдыыга министрин солбуйааччы Афанасий Постников, аҕалар лигаларын салайааччыта Айхал Габышев, Таатта улууһун баһылыгын бастакы солбуйааччы Иван Потапов эҕэрдэлээтилэр.

А.Постников министиэристибэ аатыттан республикаҕа дьиэ кэргэн сайдыытыгар кылааттарын иһин диэн анал бэлиэлэри күрэхтэһэ кэлбит аҕаларга үөрүүлээх быһыыга-майгыга туттарда.

Төһө да хаҕыс тыаллаах, тибиилээх күн-дьыл буоллар, олохтоохтор сүрдээҕин бэлэмнэммиттэрин бэлиэтиир тоҕоостоох. Оттон кыттааччылар айылҕа күчүмэҕэйдэрин аахсыбакка, дьиҥнээх эр дьоннуу күүстээх санаалаахтарын, кыайыыга дьулуурдаахтарын көрдөрөн, күрэхтэһэ сылдьаллар.

Бастакы күҥҥэ ойбон алларыы, чэйи оргутуу буолла. Эбиэттэн киэһэ маһы суоруу, бу тэрээһиҥҥэ аналлаах “төгүрүк остуол” буолуоҕа.

Онтон сарсын хайыһарынан сүүрүү, мас эрбээһин, хайытыы, саһааннааһын уонна остуолбаҕа ыттыы ыытыллар. Манна даҕатан эттэххэ, бэлэмнэммит саһаан олохтоох бэтэрээннэргэ көмө быһыытынан бэриллиэҕэ.

Санатан эттэххэ, республикатаа5ы «Аҕа күрэҕэ-2023» күрэхтэһии сүрүн тэрийээччилэринэн СР үлэҕэ уонна социальнай сайдыыга министиэристибэтэ, «Победа» ресурснай киин, республикатааҕы аҕалар лигалара, Таатта улууһун социальнай боппуруостарга управлениета, Дьүлэй нэһилиэгин дьаһалтата буолаллар.

Екатерина БЯСТИНОВА, «Забота-Арчы» хаһыат корреспондена.

Таатта, Дьүлэй нэһилиэгэ.

Добавить комментарий

Ваш адрес email не будет опубликован. Обязательные поля помечены *

186572
Бүгүн : 276