Оҕолор үчүгэй бириистэри ылан, олус үөрдүлэр

Кэбээйигэ, көҥүл тустууга норуоттар икки ардыларынааҕы кылаастаах Иннокентий Егорович Аянитов аатынан оҕолорго республикатааҕы күрэхтэһии үрдүк тэрээһиннээхтик буолан ааста. Спорт бырааһынньыгын кырачаан оҕолорго тэрийэн ыыппыт И.Е. Аянитов аймахтарыгар, улууспут, нэһилиэкпит салалтатыгар барҕа махтал!

Көбүөргэ – Өймөкөөн, Дьокуускай, Горнай, Таатта, Үөһээ Бүлүү, Кэбээйиттэн – Кэбээйи, Чагда, Арыттаах, Тыайа, Сангар, Куокуй, Сииттэ уолаттара күөн көрүстүлэр. Икки күннээх тыҥааһыннаах күөн күрэскэ олохтоохтортон Алёша Сыроватскай, Петя Федотов чемпионнаатылар. Иккис миэстэни Дамир Павлов, Мирослав Максимов, үһүс миэстэни Максимов Андрей, Дьяконов Андрей, Шарин Сеня, Кривошапкин Айсен ыллылар. Софронеев Серёжа, Левин Айаар эмиэ үчүгэй тустууну көрдөрдүлэр.

Бириис бөҕө ылан, оҕолор олус үөрдүлэр. Ол курдук, 1-кы миэстэҕэ – 10 тыһ. сертификат, 2-с миэстэҕэ – 8 тыһ., 3-с миэстэҕэ – 5 тыһ. солк. харчынан бириистэр туттарылыннылар. Ону таһынан чемпионнарга аалай лентэлэр, Иннокентий Аянитов аймахтарын анал бирииһэ ананна.

Кыайбыт да, миэстэлэспэтэх да оҕолорго И.Е. Аянитов доҕотторо, бииргэ үөрэммит доҕотторо, тэрилтэлэр, түөлбэлэр, биирдиилээн спорду сэҥээрэр, кырачаан оҕолору өйүүр дьон бириис туруордулар. Онон спорт бырааһынньыга буолла.

Оҕолор телефоҥҥа, телевизорга олорбокко, спордунан дьарыктаналлара хайҕаллаах суол! Тренердэр Данилов Николайга, Кулачиков Эдгарга эҕэрдэ!

Александра ДАНИЛОВА, СР доруобуйа харыстабылыгар уонна эргиэҥҥэ туйгуна.