Николай Егоров: “Василий туруга үчүгэй, киирсэргэ бэлэм”

Дьэ, спорду таптааччылар икки нэдиэлэ устата боксанан олорор кэмнэрэ чугаһаата. Муус устар 30 – ыам ыйын 14 күннэригэр Узбекистан киин куоратыгар Ташкеҥҥа, боксаҕа аан дойду эр дьоҥҥо XXII чемпионата ыытыллар. Чемпионакка биэс континент спортсменнара кыттыахтара. Кинилэр 13 ыйааһыҥҥа чемпион аатын ким ыларын быһаарсыахтара.

Ташкеннааҕы чемпионакка – Россия 5, Европа 2 төгүллээх чемпиона, аан дойду чемпионатын үрүҥ көмүс призера, Олимпиада кыттыылааҕа, спорт үтүөлээх маастара Василий Егоров – дойдутун чиэһин 51 киилэҕэ көмүскүүрэ күүтүллэр.

Биһиги Василий тус тренерэ, спорт маастара, Саха Республикатын үтүөлээх тренерэ Николай Егоровы кытта сибээстэһэ сырыттыбыт. Бэлэмнэнии хаамыытын билистибит.

-Биһиги билигин Сочига баарбыт. Аан дойду чемпионатыгар бэлэмнэнии бүтэһик түһүмэҕэр, – диир Николай Михайлович. – Манна Россия сүүмэрдэммит хамаандатын бастакы, иккис, үһүс нүөмэрдээх боксердара, барыта 55 спортсмен анал үөрэтэр-эрчийэр түмсүүгэ бэлэмнэнэ сылдьар. Балаһыанньа быһыытынан аан дойду чемпионатыгар Россия 2022 сыллааҕы кыайыылаахтара бары кыттыахтаахтар. Сахалартан өссө 48 киилэҕэ Россия призера Михаил Прокопьев тэҥҥэ эрчиллэ сылдьар. Хамаанда туруга үчүгэй. Эрчиллиини Россия сүүмэрдэммит хамаандатын кылаабынай тренерэ Виктор Фархутдинов бэйэтэ салайар. Биһигини кытта сборга ЮАР боксердара бааллар.

Аан дойду чемпионатыгар – дойдулар саамай бастыҥ боксердара кэлэллэр. Этэргэ дылы, бары күүстээхтэр. 51 киилэҕэ рейтинг быһыытынан казах Сакен Бибосинов билиҥҥитэ бастакы турар. Олохтоохтортон Риотааҕы-2016 Олимпиада чемпиона Хасанбой Дусматов баар.

Чемпионакка бэлэмнэниибит бастакы түһүмэҕин Чолпон-Отаҕа (Кыргызстан) барбыппыт. Онтон Сочига кэлбиппит. Муус устар 25 күнүгэр Россия боксаҕа федерациятын генеральнай секретара Татьяна Кириенко кэлэн, аан дойду чемпионатыгар кыттар Россия хамаандатын састаабын официальнайдык биллэрдэ. Аны муус устар 28 күнүгэр мантан Ташкеҥҥа көтөбүт.       

Василий туруга үчүгэй, киирсэргэ бэлэм. Биһиги кимтэн да куттаммаппыт. Ким кэлэрин-кэлбэтин аахсыбаппыт, былаан быһыытынан бэйэбит үлэбитин чиэстээхтик толоруохтаахпыт.

Санатан эттэххэ, Василий Егоров былырыын Читаҕа ыытыллыбыт Россия чемпионатыгар 51 киилэҕэ сүрүн утарсааччыларын Ахтем Закировы уонна Расул Салиевы кыайталаан, эрэллээхтик бастаан, бэйэтин ыйааһыныгар бастыҥ буоларын итэҕэппитэ.

Петр ПАВЛОВ.