Сонуннар

Николай Данилов: «Чаҕылхай түгэни бэлэхтээбиппититтэн аһара үөрдүбүт»

Дьэ, киһи сүргэтин көтөҕөрдүү анаан киэргэтиллибит “Өрөгөй” Спорка бэлэмнэнии киинигэр үс күн устата 21-гэр диэри саастаах бөҕөстөр Россия үрдүнэн бастыыр иһин күрэхтэһиилэрэ үрдүк тэрээһиннээхтик ыытыллан түмүктэннэ.

Бу эппиэттээх түһүлгэҕэ саха бөҕөстөрүттэн Лев Павлов 57 киилэҕэ эрэллээх кыайыыны ситиһэн, Россия чемпионунан буолла. Итинэн кини бүтүн Саха сирин олохтоохторун сүрдээҕин үөртэ. Лев Павлов бу кыайыытын бастатан туран, тренерэ Николай Романович Даниловка уонна төрөппүттэригэр анаата.

Түгэнинэн туһанан, Сунтаар тустууга кыһатын сүрүн тренерэ Николай Романовичтан бэйэтин санаатын кылгастык үллэстэригэр көрдөстүбүт.

Дьокуускайга буолан ааспыт эдэрдэргэ дойду түһүлгэтигэр анаан-минээн бэлэмнэнии Саҥа дьыл инниттэн Р.М. Дмитриев аатынан Олимпийскай эрэл училищетын базатыгар, оттон “Өрөгөй” Спорка бэлэмнэнии киинигэр сбор тэрилиннэ. Дьиэҕэ буолар түһүлгэ улахан эппиэтинэс сүктэрэрэ диэн баар эбит, биир ыарахан суол. Хата уолаттарбыт этэҥҥэ аһарынан, бэйэлэрин кыахтарын иһинэн туһуннулар. Хотторуу хомолтото ханна барыай, бу да сырыыга оннук буолла. Ким эрэ табыллан туһунна, ким эрэ тустуута хара маҥнайгыттан сатаммата. Ону оҕолору, тренердэри буруйдуур, сэмэлиир наадата суоҕа буолуо. Ханнык эрэ түгэҥҥэ кыайыллыан сөптөөх этэ диэн санаа элбэх киһиэхэ киирбит буолуон сөп. Тустуу быраабылата арыый да атын, аан дойду үрдүнэн бигэргэммит быраабыла. Ону кытта мөккүһүллүбэт.

Оттон Павлов Лев тустуутун туһунан этэр эбит буоллахха, бары телевизорынан, ютуб каналынан, радионан истэн-көрөн, билэн олордугут. Ааспыт Роман Дмитриев турнирыгар оҥоһуллубут алҕас син туоратылынна, финалга кыахтаахтык кыайдыбыт.

Бу сбордар буолалларыгар сүрдээх улахан үлэни ыыппыт Ил Дархаммыт Айсен Сергеевич Николаевка уонна республика спорка салалтатыгар барҕа махтал! Спортсмен ирдиирин барытын оҥорон, усулуобуйа бөҕө оҥоһулунна. Онон 17 сыл анараа өттүгэр кэлбит өрөгөй үөрүүтүн хатылаабыппытынан, Саха сирин тустууну сэҥээрээччилэригэр биир чаҕылхай түгэни бэлэхтээбиппититтэн аһара үөрдүбүт.

Санатан эттэххэ, А.И. Иванов аатынан Сунтаардааҕы спортивнай оскуолатыттан буолан ааспыт Россия түһүлгэтигэр Лев Павлов, Герман Гурьев, Кэскил Семенов, Юлиан Григорьев, Аслан Трофимов кытыннылар. Түмүккэ Лев Павлов бастаата, Юлиан Григорьев бэһистээтэ…

Петр Павлов.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

176508
Бүгүн : 74