Константин Капрынов финалга тустуоҕа

Бурятия киин куоратыгар Улан-Удэҕэ көҥүл тустууга «Байкал Опен» норуоттар икки ардыларынааҕы турнир бастакы күнэ түмүктэннэ. Бары ыйааһыннарга кыайыылаах аатын былдьаһар бөҕөстөр ааттара билиннэ.

Саха сирин хамаандатыттан Красноярскайдааҕы Иван Ярыгин аатынан норуоттар икки ардыларынааҕы турнир үһүс призера Константин Капрынов кыахтаахтык тустан финалга таҕыста. Кини утуу-субуу Турцияттан Чингисхан Эрдоганы (Опан Саты), тувинец Сайын Казырыгы уонна финалга тахсар иһин тустууга олохтоохтор эрэллэрэ Евгений Жербаевы кыайталаата. Ордук, Жербаевы ыраастык кыайыыта тустууну таптааччыларга соһуччу үөрүүлээх буолла. Финалга утарсааччытынан Кемероваттан опыттаах бөҕөс Кирилл Корнеев буолла.

Ону тэҥэ, финалистарга хотторбут Арыйаан Тютрин, Дьулус Федотов (57 кг), Владимир Егоров (61 кг), Никита Хабаров (125 кг) – «уоскутар» бөлөххө киирэн үһүс миэстэ иһин тустар быраабы былдьаһыахтара. Оттон финал аҥарыгар тиийэн хотторбут Алексей Копылов (57 кг), Ньургун Скрябин (65 кг), Албан Аввакумов (74 кг) уонна Роман Николаев (79 кг) – боруонса мэтээл иһин тустуохтара.

PS: Бөҕөстөрбүт биирдиилээн хапсыһыыларын видеотын Дьулурҕан ютуб каналыгар көрүөххүтүн сөп.

Уолаттарбытыгар ситиһиилэри баҕарабыт!

Финалга көрсүөхтэрэ:

57 кг: Начын Монгуш – Амир Чамзын (иккиэн – Тыва)

61 кг: Тувшинтулга Туменбилег (Монголия) – Алдар Бальжинимаев (Бурятия)

65 кг: Булат Батоев (Бурятия) – Ибрагим Ибрагимов (Дагестан)

70 кг: Константин Капрынов (Саха сирэ) – Кирилл Корнеев (Кемерово)

74 кг: Батбаяр Батсух (Монголия) – Азамат Нуриков (Беларусь)

79 кг: Андрей Карпач (Беларусь) – Арсен Балаян (Калининград)

86 кг: Батэрдэнэ Бямбасурен (Монголия) – Дмитрий Зайнитдинов (Красноярскай)

92 кг: Ганхуяг Ганбаатар (Монголия) – Иван Кириллов (Кемерово)

97 кг: Никита Акулинчев (Красноярскай) – Владислав Козлов (Беларусь)

125 кг: Денис Хроменков – Виталий Песняк (иккиэн – Беларусь).

Программа быһыытынан күрэхтэһии иккис күнүгэр турнир Дьокуускай бириэмэтинэн күнүс 12:00 чаастан “уоскутар” бөлөххө тустуунан саҕаланар. Финаллар 16:00 чаастан буолуохтара.

«Дьулурҕан».