Финал: Лев Павлов – Халид Магомедов

Дьокуускай. 21-гэр диэри саастаахтарга көҥүл тустууга Россия үрдүнэн биирдиилээн бастыыр иһин күрэхтэһии бастакы күнүн түмүгүнэн алта ыйааһыҥҥа финалистар билиннилэр. Күрэхтэһиигэ дойду 43 регионуттан барыта 300-чэкэ бөҕөс күөн көрсөр.

Бастакы ыйааһыҥҥа саамай эрэммит киһибит – Лев Павлов эрэллээхтик тустан, финалга таҕыста. Кини утуу-субуу Р.Исламовы (Чечня) 11:0, Д.Мохначевскайы (Саха сирэ) 11:0, Ю.Явбатировы (Дагестан) 6:0, Д.Тулаевы (Чечня) 7:2 ахсааннарынан кыайталаата.

Финалга Лев утарсааччытынан Дагестан тустууга оскуолатын иитиллээччитэ Халид Магомедов буолла. Дьиҥэ бу ыйааһыҥҥа эрдэттэн, Лев Павлов уонна Баир Баяндуев рейтинг быһыытынан ордук көрдөрүүлээхтэринэн, туспа бөлөхтөргө араарыллыбыттара. Ол эрээри, бурят бөҕөһө бастакы киирсиитигэр дагестанец Хабиб Мехтихановка кыл мүччү хотторон кэбиһэн, элбэх киһини соһутта. Аны, финалга тахсар иһин тустууга Мехтихановы – бэйэтин киһитэ Халид Магомедов 10:0 ахсаанынан күппүлүү ыытан кэбистэ.

Манна даҕатан эттэххэ, сарсын, 57 кг финалистарыгар хотторбут Д.Мохначевскай уонна Н.Захаров «уоскутар» бөлөххө киирсэр буоллулар. Ити курдук Андрей Румянцев (74 кг) эмиэ тустар кыахтанна.

PS: Уолаттарбыт биирдиилээн хапсыһыыларын видеотын «Дьулурҕан» ютуб-каналыгар киирэн көрүөххүтүн сөп.

Сарсын, муус устар 15 күнүгэр субуотаҕа күрэхтэһии программа быһыытынан күнүс 11:00 чаастан саҕаланар. Күрэхтэһии иккис күнэ – 61, 70, 79, 92 кг ыйааһыннар хапсыһыыларынан саҕаланыа. Манна биһиги Артём Слепцовка, Владимир Бояновскайга, Роман Николаевка эрэнэбит.

Финалга көрсүөхтэрэ:

57 кг: Лев Павлов (Саха сирэ) – Халид Магомедов (Дагестан)

65 кг: Гаджимурад Гаджиев (Дагестан) – Далгат Абдулкадыров (Дагестан)

74 кг: Антон Сучков (Красноярскай) – Джамал Маргушев (Крым)

86 кг: Али Шакриев (Ингушетия) – М-Тахир Ханиев (Дагестан)

97 кг: Ислам Кильчуков (Москва) – Шахман Нухаев (Чечня)

125 кг: Ахмед Шугаибов (Москва уоб.) – Саид-Хасан Ахматов (Дагестан).

Петр ПАВЛОВ.