Сонуннар

Бастакы сүүрдүү – Кыайыы күнүгэр буолуоҕа

Саха Республикатын ат спордугар федерацията (президент Руслан Федотов) 2023 сылга ыытыллар календарнай былаанын өссө тохсунньуга быһаарбыта. Ол курдук, саас, сайын уонна күһүн – ханна, ханнык сүүрдүүлэр тэриллэллэрэ былааннаммыта.

Соторутааҕыта Аммаҕа, улуус ат спордугар федерациятын көҕүлээһининэн сүүрдүү саҥа дьылын арыйар күрэхтэһии ыытыллыбыта.

Ол эрэн, республика бастыҥнара быйыл бастакынан ыам ыйын 9 күнүгэр – Аҕа дойду Улуу сэриитигэр Кыайыы күнүгэр аналлаах сүүрдүүгэ АГАТУ ипподромугар көрсүөхтэрэ.

Быһый атахтаахтар, уҥмат тыҥалаахтар бэс ыйын 12 күнүгэр сайыҥҥы сүүрдүүгэ – Россия күнүгэр анаан Үс Хатыҥнааҕы ипподромҥа илин-кэлин түсүһүөхтэрэ.

Ити курдук, календарнай былаан быһыытынан, бэс ыйын 17 күнүгэр – Чурапчы улууһа төрүттэммитэ 375 сылыгар аналлаах сүүрдүү Чурапчыга, И.И. Харлампьев аатынын «Бөтүгүттэ» ипподромугар буолуоҕа.

Бэс ыйын 24-25 күннэригэр Дьокуускай куорат дьаһалтатын сүрүннээһининэн бастакы күн – Дьокуускай дьаһалтатын бирииһигэр хамаанданан күрэхтэһии, иккис күн – Саха Республикатын Ил Дарханын, СР Правительствотын бириистэригэр сүүрдүүлэр Үс Хатыҥ ипподромугар ыытыллыахтара.

Оттон от ыйын 1 күнүгэр АГАТУ ипподромугар – СР ат спордугар федерациятын, СР Правительствотын председателин бириистэригэр сүүрдүүлэри көрүөхпүт.

Итиэннэ балаҕан ыйын 23 күнүгэр – быйылгы сүүрдүү дьылын түмүктүүр күрэхтэһиинэн Саха Республикатын Тыатын хаһаайыстыбатын бирииһигэр сүүрдүү буолуоҕа. Күрэхтэһии АГАТУ ипподромугар ыытыллара былааннанна.

Кэккэ улуустарга, бэйэлэрин күүстэринэн саха сылгыларыгар сааскы сүүрдүүлэр ыытылыннылар. Бу күннэргэ АГАТУ ипподромугар сүүрүк сылгылары эрчийии күннэтэ күүһүрэн иһэр. Күрэхтэһиилэр, сүүрдүүлэр чугаһаатылар…

«Дьулурҕан».

 

 

 

Добавить комментарий

Ваш адрес email не будет опубликован. Обязательные поля помечены *

161117
Бүгүн : 171