Боксаҕа аан дойду чемпионата

Дьэ, спорду таптааччылар икки нэдиэлэ устата боксанан олорор кэмнэрэ чугаһаата. Муус устар 30 – ыам ыйын 14 күннэригэр Узбекистан киин куоратыгар Ташкеҥҥа, боксаҕа аан дойду эр дьоҥҥо XXII чемпионата ыытыллар. Чемпионакка биэс континент спортсменнара кыттыахтара. Кинилэр 13 ыйааһыҥҥа чемпион аатын ким ыларын быһаарсыахтара.

Бокса аан дойдутааҕы федерациятын быһаарыытынан, бу чемпионакка Россия уонна Беларусь хамаандалара бэйэлэрин былаахтарынан уонна гимнэринэн кыттыахтара. Билиҥҥи туругунан Ташкент рингэтигэр 600-чэкэ боксер киирсэрэ күүтүллэр. Кинилэр ортолоругар аан дойду чемпионнара: Сакен Бибоссинов (Казахстан), Томоя Цубои (Япония), Софьян Омиха (Франция), Севон Оказава (Япония), Еонлис Эрнандес (Куба), Лорен Алфонсо (Азербайджан), Хулио Ла Круз (Куба) кыттыахтара. Бу иннинээҕи аан дойду чемпионата 2019 сыллаахха Екатеринбурга буолбута.

Манна даҕатан эттэххэ, ааспыт ыйга Нью-Делигэ (Индия) дьахталларга боксаҕа аан дойду чемпионата ыытыллыбытыгар, Россия хамаандата эмиэ кыттыбыта. Итиэннэ хамаанданан үһүс миэстэни ылбыта. 70 киилэҕэ Анастасия Демурчян кыһыл көмүс, 63 киилэҕэ Наталья Сычугова үрүҥ көмүс уонна 81-тэн үөһэ кг Диана Пятак боруонса мэтээллэри ылары ситиспиттэрэ.

Ташкеннааҕы чемпионакка биһиги биир дойдулаахпыт – Россия 5, Европа 2 төгүллээх чемпиона, аан дойду чемпионатын үрүҥ көмүс призера, Олимпиада кыттыылааҕа, спорт үтүөлээх маастара Василий Егоров – дойдутун чиэһин 51 киилэҕэ көмүскүүрэ күүтүллэр.

Петр ПАВЛОВ.