Үгэс салҕанар

Муус устар 7 күнүгэр, Чурапчыга А.И. Федотов аатынан успуорт киинигэр, нэһилиэктэр аҕам саастаахтарын, пенсионердарын спартакиадатыгар (ковидынан сибээстээн кэнники сылларга ыытыллыбатаҕа) элбэх киһи кытынна. Манна спортсменнар да, көрөөччүлэр да элбэхтэр.

Күрэхтэһиини үөрүүлээхтик аһыыга улуус баһылыга Степан Саргыдаев, Чурапчы нэһилиэгин баһылыга Владимир Сивцев, кырдьаҕастар сэбиэттэрин бэрэссэдээтэлэ Мотрена Матвеева, бэтэрээн спортсменнар сэбиэттэрин бэрэссэдээтэлэ Герасим Платонов эҕэрдэ тыл эттилэр. Бастыҥ спортсменнар дохсун ытыс тыаһыгар арыалланан наҕараадалары туттулар.

Күүстэри тэҥниир сыалтан, күрэхтэһии холбоһуктаах хамаандаларынан ыытылынна. Мындаҕаайы хамаандата (Болтоҥо, Мырыла, Мындаҕаайы, Одьулуун), Дириҥ (Чакыр, Хайахсыт, Дириҥ), Мугудай (Бахсы, Алаҕар, Мугудай, Төлөй), Чурапчы бастакы, иккис хамаандалара, Сылаҥ (Арыылаах, Кытаанах, Сылаҥ) хамаандалара күөн көрүстүлэр. Хардары-таары кыайсыы, илин-кэлин түсүһүү күрэхтэһии абытайа манна буолла.

Сахалыы волейболга Чурапчы бастакы хамаандата кыайан үөрдэ-көттө. Иккис — Мындаҕаайы, үһүс — Дириҥ хамаанлалара буоланнар, дьоннорун-сэргэлэрин үөртүлэр. Остуол тенниһигэр күрэхтэһээччилэр сымсалара, түргэн туттунуулаахтара сөхтөрдө. Түмүккэ Дириҥ спортсменнара бастаатылар. Мындаҕаайы — иккис, Чурапчы бастакы хамаандата — үһүс миэстэлэри ыллылар. Саахымакка киирсии эмиэ сытыытык барда. Дириҥ кыайда, иккискэ Чурапчы бастакы хамаандата тахсан үөрүү буолла. Мындаҕаайылар үһүс бириистээх миэстэҕэ таҕыстылар. Дуобакка эмиэ киирсии кытаанаҕа буолла. Манна Чурапчы бастакы хамаандата кыайда. Иккискэ Чурапчы иккис хамаандата тахсан үөрдэ. Үһүскэ Дириҥ хамаандата таҕыста. Сахалар төрүт оонньуубутугар  хабылыкка, хаамыскаҕа сэргэх киирсии буолла. Мугудай сымса-сылбырҕа туттунуулаах, имигэс илиилээх спортсменнара бастаатылар. Мындаҕаайы спортсменнара иккистээтилэр. Чурапчы бастакы хамаандата үһүскэ таҕыста. Хайыһарга тиритэ-хорута сүүрүү, ыһыылаах-хаһыылаах күрэхтэһии кэнниттэн, Дириҥ — бастакы, Сылаҥ — иккис, Чурапчы бастакы хамаандата үһүс буоллулар.

Сыралаах киирсии уопсай түмүгэр Дириҥ хамаандата бастаан тахсан үөрдэ-көттө. Иккис Чурапчы бастакы хамаандата, үһүс Мындаҕаайы буолан дьоннорун-сэргэлэрин үөртүлэр. Кубогынан наҕараадаланнылар. Көрүҥнэринэн кыайыылаахтар, бириистээх миэстэлээхтэр мэтээл кэттилэр.

Спартакиада олус сэргэхтик, тэрээһиннээхтик ыытылынна. Хамаандалар бары оҥостон, үчүгэйдик бэлэмнэнэн кэлбиттэрэ үөрдэр, эдэр ыччакка үтүө холобур буолар. Салгыы биир сыл кыһыҥҥы, иккис сылыгар сайыҥҥы күрэхтэри ыыппыт киһи диэн санаа этилиннэ.

Чурапчы спорт туонатынан аатырарын ити курдук үгэс салгыыр.

Григорий ТУРАНТАЕВ – Чолбон. Суруналыыс, СР спордун бэтэрээнэ. Чурапчы.

Ааптар хаартыскаҕа түһэриилэрэ.