Сонуннар

Үһүс күҥҥэ тустуохтара…

Дьокуускай. 21-гэр диэри саастаах бөҕөстөр Россия үрдүнэн бастыыр иһин күрэхтэһиилэрин бүтэһик күнүгэр түөрт ыйааһыҥҥа кыайыылаахтар ааттара быһаарыллыа.

Бастаан программа быһыытынан, финалга тахсыбыт бөҕөстөргө хотторбуттар «уоскутар» диэн ааттыыр бөлөхтөрүгэр тустуулар буолуохтара. Онуоха 61 киилэҕэ биһигиттэн, Нахушевы (Крым) кыайан баран, Ахмадудиновка хотторбут Эдуард Попов – тувинец Доржуну утары тахсыа. Манна кыайар түгэнигэр уолбут Шоргоевы (Иркутскай) кытта көрсүөн сөп. Бу бөлөххө үһүс миэстэ иһин Шигалугов утарсааччыта ким буоларын кэтэһэн олорор.

Бу ыйааһын иккис бөлөҕөр Юлиан Григорьев үс киһини хотон баран, төрдүһүгэр – дагестанец Расуловка мөккүөрдээх киирсиигэ сабырыйтаран кэбиһэн, боруонса мэтээл иһин киирсэр буолла. Юлиан утарсааччытынан сэрэйдэххэ Хункеров – Жилясов пааратын кыайыылааҕа буолара буолуо.

70 киилэҕэ биир эрэлбит Владимир Бояновскай – Россия былырыыҥҥы 65 кг ыйааһыҥҥа кыайыылааҕа Эльтемировы (Чечня) хотон баран, финалга тахсыыга сүрдээх хатыһыылаах хапсыһыыга дагестанец Лабазановка сабырыйтаран кэбистэ. Онон эмиэ Юлиан Григорьев курдук, күрэхтэһии үһүс бириистээх миэстэтин иһин тустуо.

Уолаттарбытыгар ситиһиилээх тустууну баҕарабыт!

Күрэхтэһии күнүс 11:00 чааска «уоскутар» бөлөх тустуутунан саҕаланар. Финаллар 14:00 чаастан буолуохтара.

Финалистар:

61 кг Эльдар Ахмадудинов – Абдурахман Расулов (иккиэн Дагестан)

70 кг Магомед Байтукаев (Чечня) – Магомед Лабазанов (Дагестан)

79 кг Шамиль Кадилов – Ибрагим Кадиев (иккиэн Дагестан)

92 кг Еремей Сергеев (Чувашия) – Мустафагаджи Малачдибиров (Дагестан).

«Дьулурҕан».

Добавить комментарий

Ваш адрес email не будет опубликован. Обязательные поля помечены *

161083
Бүгүн : 137