Тустуу сайдыытыгар саҥа сүүрээн

Көҥүл тустууга Саха сирин уолаттарга сүүмэрдэммит хамаандатын тренердэрэ бэйэлэрин үлэлэригэр айымньылаахтык сыһыаннаһан, саҥа хайысханы киллэрэллэрин киһи хайгыыр эрэ. Ол курдук кинилэр тустууну сайыннарыыга, бастыҥ оҕолору кытта салгыы хайдах дьарыктанарга үлэ саҥа, сонун ньымаларын киллэрэллэр.    

Хамаанда сүрүн тренерэ Кузьма Сивцев: «Бүгүн Уус Алдан Бороҕонугар өрүс илин эҥэринээҕи улуустар хамаандаларыгар 2009-2010 с.т. оҕолор ортолоругар сүрүн хамаанданы сүүмэрдииргэ хапсыһыылары түмүктээтибит. Барыта 79 кыттааччы кэлэн кытынна. Бу тэрээһин түмүгүнэн 12 ыйааһыҥҥа 24 оҕо, илин эҥэр зонатыттан – үөрэнээччилэр сааскы каникулларын кэминээҕи республикатааҕы сүүмэрдиир дьарыкка киирэр быраабы ыллылар”, – диэн билиһиннэрдэ.

Аны сарсын, кулун тутар 18 күнүгэр Нам улууһугар нэһилиэк баһылыгын ыытар турнирыгар киин улуустар сүүмэрдиир хапсыһыылара ыытыллаары турар. Онно Нам, Хаҥалас, Кэбээйи, Горнай, Нерюнгри, Алдан, Дьокуускай куорат хамаандалара ыҥырылыннылар.

Ити курдук, кулун тутар 25 – муус устар 3 күннэригэр үс зонанан сүүмэрдэнэн талыллыбыт оҕолорго анаан анал үөрэтэр-эрчийэр түмсүү тэриллиэҕэ. Онтон кулун тутар 24-25 күннэригэр Бүлүү бөлөх зонатын маннык тэрээһинэ Сунтаарга ыытыллыаҕа.

“Дьулурҕан”.