Түөрт киһибит финалга таҕыста

Олимпийскай чемпион Роман Дмитриев кэриэһигэр көҥүл тустууга эдэрдэргэ (21-гэр диэри саастаахтарга) үгэскэ кубулуйбут норуоттар икки ардыларынааҕы турнир бастакы күнэ түмүктэннэ. Күрэхтэһии уратытынан, быйылгыттан дьахталлар тустуулара киирэн биэрбитэ буолар.

Хапсыһыылар үс көбүөрүнэн ыытылыннылар. Кыргыттарга уонна уолаттарга биэстии ыйааһыҥҥа финалга кимнээх тусталлара быһаарылынна.

57 кг. Эрдэттэн суоттаммыппыт быһыытынан, бу саастаахтарга билигин тумус туттар тустуукпут Лев Павловка эрэлбит улахан этэ. Уолбут бастакы эргииргэ бэйэтин киһитэ Юлиан Охлопковы кыайан баран, салгыы күрэхтэһиигэ Иран улахан дьоҥҥо быйылгы чемпионатын иккис призера Али Моменины 6:0 ахсаанынан эрэллээхтик хотто. Онтон финал чиэппэригэр эмиэ Иран чемпионатын, этэргэ дылы «буруолуу сылдьар» үһүс призера Эбрахим Ховарины кытта көрүстэ. Бу, сүрдээх тыҥааһыннаахтык барбыт хапсыһыыга, судьуйалар кыайыыны биһиги бөҕөспүтүгэр биэрдилэр. Иранец хапсыһыы бүтүүтэ куота сырытта. Тустуу хайдах барбытын «Дьулурҕан» хаһыат ютуб каналыгар көрөн бэйэҕит сыаналыаххытын сөп.

Маныаха бэйэбит уолбут кыайбытыгар үөрбэккэ, сорохтор тута «балыйан кыайдыбыт» диир саҥалара иһиллэрэ хомолтолоох. Онтон иранецтар тоҕо эрэ мөккүһэ, айдаарса барбатылар ээ.

Манна биир түгэни санатар оруннаах. 86 киилэҕэ иранец буряты кытта тустуутугар көбүөргэ ыҥырыллан баран, өр баҕайы кэтэһиннэрэн тахсыбатаҕар, кыайыыны бурятка биэрдилэр. Ол эрээри, чочумча буолан баран, өрүттэри кытта кэпсэтии түмүгэр кинилэр тустууларын хаттаан ыытарга быһаардылар. Онуоха иранец 10:0 ахсаанынан кыайда. Итиэннэ салгыы күрэхтэһиигэ ситиһиилээхтик кыттан, финалга таҕыста. Онон иранецтар күлүктэригэр имнэннэхтэрэ, бастаан хотторуулааҕынан ааҕыллан баран, иккистээн тустууга кыайыыны ситиһэн. Сарсын уоллара өссө чемпионнуо. Атын сиргэ эбитэ буоллар, итиннэ иккистээн туһуннарбаттар.

Салгыы күрэхтэһиигэ Лев – узбек Бехруз Туранмурадовы очукуонан ыраастык (10:0) кыайан финалга таҕыста. Онно кини бурят Баир Баяндуевы кытта тустуоҕа.

Өскөтүн Лев Павловка эрдэттэн эрэлбит улахан эбит буоллаҕына, 74 киилэҕэ кыттыбыт Владимир Бояновскай бэйэтин тустуутунан биир дойдулаахтарын үөртэ. Кини финалга тахсар иһин тустууга Россия уолаттарга күрэхтэһиитин призера Антон Сучкову (Красноярскай) кыайыыта улаханнык сыаналаныан сөп. Владимир сарсын финалга Сергей Пушкинныын көрсөр.

Ити курдук, кыргыттарбыт Александра Копылова уонна Надежда Куличкина (иккиэн 50 кг) финалга тахсан бэйэ-бэйэлэрин кытта киирсэр буоллулар. Онон биир чемпионнаахпыт дэнэбит. Ону тэҥэ хас да уолбут сарсын сарсыарда «уоскутар» бөлөххө кыттыахтара.

Сарсын хаалбыт ыйааһыннарга хапсыһыылар саҕаланаллар. Киэһэтин, күрэхтэһиини үөрүүлээхтик аһыы кэнниттэн бүгүн саҕалаабыт ыйааһыннарга финаллар буолуохтара.

PS: Күрэхтэһии сорох хапсыһыыларын «Дьулурҕан» хаһыат ютуб каналыгар киирэн көрүөххүтүн сөп.

Сарсын финалга көрсүөхтэрэ:

57 кг: Лев Павлов (Россия, Саха сирэ) – Баир Баяндуев (Россия, Бурятия).

65 кг: Мохаммадреза Шакери (Иран) – Андраник Аветисян (Армения).

74 кг: Сергей Пушкин (Россия, Коми) – Владимир Бояновскай (Россия, Саха сирэ).

86 кг: Хуман Бехзадпур (Иран) – Влад Фризен (Россия, Красноярскай).

97 кг: Владислав Козлов (Беларусь) – Ислам Кильчуков (Россия, КБР).

50 кг: А.Копылова – Н.Куличкина (иккиэн – Россия, Саха сирэ)

55 кг: А.Булава (Беларусь) – Р.Маммадова (Азербайджан)

59 кг: Н.Хроменкова (Россия) – У.Кудзин (Беларусь)

65 кг: Д.Глазунова (Беларусь) – К.Братчикова (Россия)

72 кг: эргиир систиэмэтинэн.

Петр ПАВЛОВ.

Ааптар хаартыскаҕа түһэриитэ.