Сарсыҥҥы финалга икки уолбут таҕыста

Олимпийскай чемпион Роман Дмитриев аатынан эдэрдэргэ (21-гэр диэри саастаахтарга) көҥүл тустууга норуоттар икки ардыларынааҕы турнир иккис күнүгэр уолаттар биэс ыйааһыҥҥа күөн көрүстүлэр.

61 киилэҕэ Саха сирин хамаандатын биир эрэлэ –Муома ыччата Артём Слепцов бастакы эргиирдэргэ бэйэтин дьонун Д.Аввакумовы, А.Егоровы, Ю.Григорьевы уонна финалга тахсар иһин киирсиигэ тувинец Давид Сагдыны эрэллээхтик кыайталаан финалга таҕыста. Манна даҕатан эттэххэ, ити киниэхэ хотторбут уолаттар сарсын сарсыарда «уоскутар» бөлөххө киирэн, ким Сагдыны кытта үһүс миэстэни былдьаһарын быһаарсыахтара.

Бу ыйааһыҥҥа аллараа бөлөхтөн финалга иранец А.Голизаде таҕыста. Кини эмиэ утарсааччыларын киһилээбэтэ, барыларын эрэллээхтик кыайталаата.

70 кг финалга Бурятия уонна Иран бөҕөстөрө таҕыстылар. Манна биһиэннэриттэн иранецка сабырыйтарбыт Д.Куприянов уонна К.Мордовской «уоскутар» бөлөххө тустуохтара.

79 кг ыйааһыҥҥа, соторутааҕыта Дальнай Восток эдэрдэргэ күрэхтэһиитигэр бастаабыт Роман Николаев үчүгэй тустууну көрдөрөн (россиянар В.Суановы уонна С.Расуловы кыайталаан), быһаарыылаах хапсыһыыга киирдэ. Финалга уолбут утарсааччытынан иранец М.Багери буолуоҕа.

Сарсын, кулун тутар 12 күнүгэр «уоскутар» бөлөх тустуулара программа быһыытынан 11:00, оттон финаллар 14:00 чаастан саҕаланыахтара.

Сарсыҥҥы финаллар:   

61 кг: Артём Слепцов (Россия, Саха сирэ) – Али Голизадега (Иран)

70 кг: Тамир Ешинимаев (Россия, Бурятия) – Али Резаи (Иран)

79 кг: Маджид Багери (Иран) – Роман Николаев (Россия, Саха сирэ)

92 кг: Мохаммад Азими (Иран) – Егор Белских (Россия)

125 кг: эргиир систиэмэтэ.

Петр ПАВЛОВ.