Күрэхтэһии күүһүрэн, таһыма үрдээн иһэрэ бэлиэтэннэ

Олимпийскай чемпион Роман Дмитриев кэриэһигэр көҥүл тустууга эдэрдэргэ норуоттар икки ардыларынааҕы турнир иннинэ Бэчээт дьиэтигэр, күрэхтэһиини тэрийээччилэр суруналыыстары кытта көрсүһүүлэрэ тэрилиннэ.

Пресс-конференцияны Р.М. Дмитриев аатынан Олимпийскай эрэл училищетын дириэктэрэ Семен Чердонов иилээн-саҕалаан ыытта. Тэрээһиҥҥэ Саха Республикатын физическэй культураҕа уонна спорка миниистирэ Леонид Спиридонов, Россия спортивнай тустууга федерациятын эппиэттээх үлэһитэ Петр Юмшанов, Россия эдэрдэргэ сүүмэрдэммит хамаандатын сүрүн тренерэ Абдусамад Гадисов, Россия кыргыттарга хамаандатын тренердэрэ Алена Карташова уонна Григорий Брайко кытыннылар, бэйэлэрин санааларын үллэһиннилэр.

Билигин төһө да ыарахан күннэр-дьыллар бүрүүкээн турдаллар, биһиги күрэхтэһиибит таһымын түһэрбэт. Россия спорка министиэристибэтин, тустууга федерациятын кытта ыкса үлэлээһин түмүгэр бүгүҥҥү түһүлгэҕэ 12 дойду спортсменнара кэллилэр. Маныаха бастатан туран, Леонид Спиридонов, киинтэн үп көрүллүбүтүн ыйда итиэннэ Саха сирин Ил Дархана Айсен Николаевка махтанна.

Турнирга 12 дойдуттан, дойду 27 регионуттан барыта 272 спортсмен кыттар, ити иһигэр, аан бастакытын ыытыллар кыргыттар тустууларыгар көбүөргэ 83 спортсменка тахсыаҕа. Маныаха Петр Юмшанов: “Биһиги ыҥырыыбытын ылынан өрүү кэлэр дойдулар хамаандаларыгар махтанабыт. Билигин Россия спортивнай тустууга федерацията улахан үлэни ыыта сылдьар. Быйыл күһүн ыытыллар аан дойду чемпионатыгар кыттарга сыаллаан үлэ барар. Билиҥҥитэ тустуу федерацията Азия континеныгар көһүүтүн туһунан боппуруос көрүллүбэт, биһиги Европа континеныгар хаалабыт. Барыта табылыннаҕына, Парижтааҕы Олимпиадаҕа кыттыахпыт. Ону сотору буолар улахан түмсүүлэр, мунньахтар быһаарыахтара”.

Абдусалам Гадисов: “Саха сиригэр хаһан баҕарар бэйэбит дьиэбитигэр курдук улахан үөрүүнэн кэлэбит. Биир ыйынан Россия күрэхтэһиитигэр эмиэ кэлиэхпит. Быйылгы турнир састаап өртүнэн күүстээх эбит. Кыргыттар тустуулара киллэриллэн биэрбитэ, күрэхтэһиини киэргэтиэ дии саныыбын. Уолаттарга Иран хамаандата күүстээх састаабы аҕалбыт. Биһиги биэс кыһыл көмүс мэтээлгэ суоттанабыт. Көбүөр көрдөрүө. Турнир сылтан сыл ахсын күүһүрэн, таһыма үрдээн иһэр. Маныаха, тэрийээччилэргэ махтал!”

Григорий Брайко: “Роман Дмитриев турнирыгар кыргыттар тустуулара киирэн биэрбитэ үөрүүлээх. Бу күрэхтэһии – инники ситиһиилэргэ үктэл буоларыгар саарбахтаабаппын. Саха сиригэр кыргыттар тустуулара сайдарыгар баҕарабын”.

Пресс конференция кэмигэр күрэхтэһии наҕараадаларын көрдөрүүгэ таһаардылар. Ол курдук, турнир кыайыылаахтарыгар Роман Дмитриев сэбэрэтэ ойууламмыт кэрэ мэтээллэри тэҥэ, аны сиэдэрэй оҥоһуулаах чемпионнар курдара туттарыллыахтара.

Күрэхтэһиигэ киирии – босхо! Онон спорду таптааччылар, тустууну сэҥээрээччилэр бары тутуспутунан күргүөмүнэн “Өрөгөйгө” кэлэн хапсыһыылары илэ хараххытынан көрөргүтүгэр, биир дойдулаахтарбытыгар ыалдьаргытыгар, Саха сиригэр көҥүл тустуу биһиринэрин көрдөрөргүтүгэр баҕарабыт. Бу буолуо биһиги, Роман Михайлович Дмитриев үтүө аатыгар сүгүрүйүүбүт.  

Петр ПАВЛОВ.

Ааптар хаартыскаҕа түһэриитэ.