Сонуннар

Роман Дмитриев турнира: Бөҕөстөрбүтүгэр эрэнэбит

Эрдэ суруйбуппут курдук, кулун тутар 10-12 күннэригэр «Өрөгөй» Спорка бэлэмнэнии киинигэр олимпийскай чемпион Роман Дмитриев сырдык аатыгар үтүө үгэскэ кубулуйбут көҥүл тустууга эдэрдэргэ норуоттар икки ардыларынааҕы күрэхтэһии ыытыллар.

Саха сирин көҥүл тустууга эдэрдэргэ хамаандатын сүрүн тренерэ Василий Неустроев быһаарыытынан бу күрэхтэһиигэ олохтоохтортон 63 бөҕөс кыттарыгар сайаапка түһэриллибит. Хамаандаҕа Лев Павлов, Петр Адамов, Николай Охлопков (57 кг), Артём Слепцов, Андрей Мидловец, Виктор Яковлев, Юлиан Григорьев (61 кг), Игорь Матвеев, Аслан Трофимов, Николай Спиридонов (65 кг), Владимир Бояновскай (74 кг), Роман Николаев (79 кг) уо.д.а. бэйэлэрин саастыылаахтарыгар Дальнай Востокка, Россияҕа кэккэ ситиһиилээх уолаттарбыт бааллар.

Бу түһүлгэ, муус устарга эмиэ «Өрөгөйгө» ыытыллар Россия 21-гэр диэри саастаах спортсменнарыгар күрэхтэһии иннинэ уолаттарга бэйэ кыаҕын көрүнүү, бэлэмнэнии буолар.

Күрэхтэһиигэ биир бастакынан, уон кыттааччылаах Иран күүстээх хамаандата кэлэн, Саха сирин бөҕөстөрүн кытта бииргэ эрчиллиитин ыытта.

Уолаттарга уонна кыргыттарга уоннуу ыйааһыҥҥа, ол аата, барыта 20 ыйааһыҥҥа кыайыылаахтар уонна призердар быһаарыллыахтара. Манна даҕатан эттэххэ, хас ыйааһын ахсын бастакы миэстэлээхтэргэ – 35, иккистэргэ – 25, үһүстэргэ – 15 тыһ. солк. харчынан бириистэр туттарыллыахтара. Кыайыылаахтары бэлэмнээбит тренердэр 10 тыһ. солк. бэлиэтэниэхтэрэ.

Санатан эттэххэ, былырыын Роман Дмитриев кэриэһигэр Бүтүн Россиятааҕы аһаҕас турнирга Саха сирин хамаандата 7 мэтээли ылары ситиспитэ: Лев Павлов (57 кг) бастакы, Иван Потапов (65 кг), Даниил Иванов (125 кг) иккис, Петр Адамов (57 кг), Айтал Громов, Валентин Бурнашев (61 кг), Олег Фомин (70 кг), Борис Гаврильев (79 кг) үһүс миэстэлэри ылбыттара. Быйыл да бөҕөстөрбүтүгэр эрэнэбит.

Спорду таптааччылар, тустууну сэҥээрээччилэр бары тутуспутунан күргүөмүнэн “Өрөгөйгө” кэлэн хапсыһыылары илэ хараххытынан көрөргүтүгэр, биир дойдулаахтарбытыгар ыалдьаргытыгар, Саха сиригэр көҥүл тустуу биһиринэрин көрдөрөргүтүгэр баҕарабыт. Бу буолуо биһиги, Роман Михайлович Дмитриев үтүө аатыгар сүгүрүйүүбүт.

«Дьулур5ан».

Добавить комментарий

Ваш адрес email не будет опубликован. Обязательные поля помечены *

161065
Бүгүн : 119