Сонуннар

Гроссмейстердар оонньууга ыҥыраллар

Саха сиригэр физкультурнай хамсааһын 100 сыллаах үбүлүөйүгэр анаан дуобакка Дьокуускайга күргүөмнээх күрэхтэһии тэриллэр буолла. Ол курдук, муус устар 2 күнүгэр «Өрөгөй» Спорка бэлэмнэнии киинигэр 500 дуоскаҕа биир кэмнээх сеанс ыытыллар.

Альтернативнай сеанс диэҥҥэ дуобаты таптааччылары утары 8 гроссмейстер киирсиэ: Александр Азаров, Гаврил Колесов, Иван Токусаров, Николай Стручков, Андрей Федотов, Матрена Ноговицына, Ксения Нахова, Наталия Шестакова.

Балаһыанньа быһыытынан, сеанска спорт маастардарыттан ураты ким баҕалаах барыта кыттара көҥүл. Хас биирдии кыттааччыга сертификат бэриллэр. Оттон гроссмейстери кыайбыт киһи өйдөбүнньүк бэлэҕинэн наҕараадаланыа. Кыттыылаахтары бэлиэтээһин муус устар 2 күнүгэр күнүс 12:00 чааска буолар. Кыттыан баҕалаахтар маннык нүөмэрдээх телефоҥҥа билсиэххитин сөп +7 924 764-30-97.

Манна даҕатан эттэххэ, биһиги республикабытыгар маннык тэрээһин 2012 сыллаахха ыытыллыбыта. Онно 7 гроссмейстер 300 киһини кытта оонньообута. Оттон аан дойду таһымыгар ылан көрдөххө, былырыын Санкт-Петербург куоракка 350 киһи кыттыылаах сеанс ыытыллыбыт эбит.

Онон бу тэрээһин республикаҕа дуобат сайдыытыгар төһүү күүс буолара саарбахтаммат.

Бэлиэ тэрээһини Саха Республикатын физическэй култуураҕа уонна спорка министиэристибэтэ, «Өрөгөй» Спорка блэлэмнэнии киинэ, СР физическэй култуураҕа уонна маассабай спорка управлениета, СР дуобакка федерацията сүрүннүөхтэрэ.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

186585
Бүгүн : 289