Чемпионат сорох түмүктэрэ

РСФСР, Саха АССР үтүөлээх тренерэ Арсентий Петров сырдык аатыгар Саха Республикатын боксаҕа быйылгы чемпионатыгар 19 хамаандаттан барыта 83 боксёр кытынна. Кинилэр ортолоругар Россия спордун 6 маастара, 28 маастарга кандидата күөн көрүстэ.

Чемпионат түмүгүнэн кыайыылаахтар уонна иккис-үһүс буолбуттар тустаах мэтээллэринэн, грамоталарынан наҕараадаланнылар. Ону тэҥэ анал бириистэр оонньоммуттарыгар, «Бастыҥ боксёрунан» – 63,5 кг чемпиона Айтал Дьяконов (ХИФУ-Мэҥэ Хаҥалас), «Кыайыыга дьулуурун иһин» – 54 киилэҕэ иккис миэстэлэммит Валентин Платонов (ОЭУ-Анаабыр) уонна «Бастыҥ судьуйа» – Бүтүн Россиятааҕы категориялаах судьуйа Лука Парников (Дьокуускай) ааттаннылар.

Быйылгы чемпионат историяҕа киирэр бэлиэ түгэнинэн 36 саастаах спорт маастара Петр Егоров (Мэҥэ Хаҥалас) төрөөбүт республикатыгар боксаҕа 12-с төгүлүн бастааһына буолла. Бокса курдук ыарахан көрүҥҥэ, бу киһи дэбигис ситиспэт көрдөрүүтэ.

Боксаҕа республика чемпионата биирдиилээн бастыыр иһин ыытыллар. Онон хамаанданан түмүк таһаарыллыбат. Ол да буоллар, мэтээлгэ тиксибит спортсменнартан аттаран, бастыҥнар хантан сылдьалларын, официальнайа суох хамаанданан түмүгү быһаарыахха сөп.

Биллэн турар, республика күүстээх боксёрдара сүрүннээн М.К. Аммосов аатынан Хотугулуу Илиҥҥи федеральнай университекка уонна Р.М. Дмитриев аатынан Олимпийскай эрэл училищетыгар үөрэнэллэр, онно эрчиллэллэр. Ол эрээри, кинилэр иккис зачёт быһыытынан төрүт улуустарын аатын көмүскүүллэр. Буолан ааспыт чемпионакка Мирнэй, Бүлүү, Сунтаар, Нерюнгри, Хаҥалас хамаандалара суолта биэрэн, балачча кыттааччыларын ыыппыттар.

Түмүккэ, ХИФУ уонна ОЭУ аахсыбатахха, Мирнэй 7 мэтээллээх (2 бастакы, 1 иккис, 4 үһүс), Нам 5 мэтээллээх (1 бастакы, 1 иккис, 3 үһүс), Дьокуускай 5 мэтээллээх (1 бастакы, 1 иккис, 3 үһүс), Уус Алдан 4 мэтээллээх (3 бастакы, 1 иккис).

Ити курдук, Сунтаар, Мэҥэ Хаҥалас, Горнай, Ньурба, Бүлүү, Нерюнгри 3-түү мэтээллээхтэр. Салгыы эттэххэ, Чурапчы, Хаҥалас 2-лии, Анаабыр, Өлүөхүмэ, Үөһээ Бүлүү, Кэбээйи, Өлөөн уонна Таатта 1-дии мэтээллээхтэр. Дьэ мантан бэйэҕит суоттаан, ырытан таһаарыҥ, бокса сайдыытыгар ханна үлэ ыытылларын уонна ханна күүстээх боксёрдар үүнэн-үөскээн тахсалларын.

Петр Павлов.