Сонуннар

“Азия оҕолоро”: Ааспыт оонньууларга хайдах этэй?      

2019 сыл олунньу 8-17 күннэригэр Южносахалинскай куоракка бастакы кыһыҥҥы «Азия оҕолоро» аан дойдутааҕы спортивнай күрэхтэһии буолан ааспыта. Манна 20 дойдуттан 1196 спортсмен спорт аҕыс көрүҥэр (хайыһар, хайаттан хайыһарынан түһүү, трамплинтан ыстаныы, биатлон, сноуборд, шорт трек, хаҥкынан фигурнай хатааһылааьын, хоккей) барыта 54 комплект мэтээл иһин күрэс былдьаспыта.

Бу күрэхтэһии уотун – Өлүөнэ өрүс очуостарыгар былыргы үгэстэри тутуһан саҕыллыбыт уоту оонньуулар посолларынан биллэриллибит олимпийскай чемпионка Анна Богалий бастакынан факелга умаппыта улахан тэрээһин үрдүк таһымын туоһулуур. 50 хонук устата уот эстафетата Уһук Илин федеральнай уокуругу тилэйэ кэрийбитэ. Аҥаардас Сахалин Курил арыыларын устун 4112 км уһуннаах маршрутунан эстафетаҕа 370 факелоносец кыттыбыта. Олунньу 9 күнүгэр оонньуу үөрүүлээх аһыллыытыгар уот Южносахалинскай куорат киин болуоссатыгар уматыллыбыта.

“Азия оҕолоро” бастакы кыһыҥҥы оонньууларга хатыһыылаах күрэхтэр түмүктэринэн Армения, Афганистан, Гонконг, Кытай, Индия, Иордания, Кувейт, Кыргызстан, Монголия, Непал, ОАЭ, Сахалинская уобалас-2, Сирия, Таджикистан, Таиланд, Туркменистан, Узбекистан, Филиппины хамаандалара мэтээлгэ тиксибэтэхтэрэ эрээри, уһун сындылҕаннаах эрчиллиилэрэ, күрэхтэһии тыҥааһынын эттэринэн-хааннарынан билбиттэрэ, кэлэр кыайыыларга олук буолаллара саарбаҕа суох.

Хоккейга Кувейт оҕолорун хамаандата 4 оонньуу түмүгэр 219 шайбаны бэйэтин воротатыгар киллэртэрбитэ уонна утарылаһааччыларыгар биир да шайбаны киллэрбэтэх да буоллар, көрөөччүлэргэ сөхтөрөн, олимпийскай чемпионнар Буре, Фетисов хайҕабылларын ылан, кыайыыга дьулуурдарын иһин мэтээллэри түөстэригэр кэтэннэр, хотторуу хомолтотун билбэтэхтэрэ.

Сахабыт сирин эдэр спортсменнарыттан мэтээллэргэ тиксибит биатлонист Николай Максимовы, хайыһардьыттар Иван Заворотныҕы, Владислав Парфеновы бэлиэтиэххэ сөп.

2019 сыллааҕы хамаанданан түмүк көрдөрүү:

  1. Ураллааҕы ФУо – 10 кыһыл көмүс, 5 үрүҥ көмүс, 9 боруонса, барыта 24 мэтээл.
  2. Москва – 9 кыһыл көмүс, 5 үрүҥ көмүс, 7 боруонса, барыта 21 мэтээл.
  3. Сахалин уобалаһа – 8 кыһыл көмүс, 9 үрүҥ көмүс, 9 боруонса, барыта 26 мэтээл.
  4. Корея – 8 кыһыл көмүс, 9 үрүҥ көмүс, 6 боруонса, барыта 23 мэтээл.
  5. Сибиирдээҕи ФУо – 8 кыһыл көмүс, 8 үрүҥ көмүс, 9 боруонса, барыта 25 мэтээл.
  6. Казахстан – 7 кыһыл көмүс, 7 үрүҥ көмүс, 6 боруонса, барыта 20 мэтээл.
  7. Дальнай Восток – 3 кыһыл көмүс, 3 үрүҥ көмүс, 4 боруонса, барыта 10 мэтээл.
  8. Япония – 1 кыһыл көмүс, 3 үрүҥ көмүс, барыта 4 мэтээл.
  9. Татарстан – 1 кыһыл көмүс.
  10. Саха сирэ – 3 үрүҥ көмүс, 3 боруонса, барыта 6 мэтээл.
  11. Башкортостан – 1 үрүҥ көмүс, 1 боруонса, барыта 2 мэтээл.

Биллэрин курдук, ааспыт күрэхтэһиигэ Саха сирин спортсмен оҕолоро – үс үрүҥ көмүс, үс боруонса мэтээли ылары ситиспиттэрэ. Оттон билигин үгэннээн буола турар 2-с кыһыҥҥы оонньууларга Кузбазска, мэтээлбит ахсаанын куоһарыахпыт, көмүс мэтээлгэ тиксиэхпит дуо?

Бэчээккэ бэлэмнээтэ Михаил СОСИН.     

Добавить комментарий

Ваш адрес email не будет опубликован. Обязательные поля помечены *

136679
Бүгүн : 188