Ариан Монастырев: “Кыайыылаахтар сөпкө быһаарылыннылар”

Боксаҕа бастакы категориялаах судьуйа Ариан Монастырев (Майа) соторутааҕыта Анатолий Филиппов бирииһигэр уолаттарга республикатааҕы күрэхтэһиигэ уонна Арсен Петров кэриэһигэр Саха сирин улахан дьоҥҥо чемпионатыгар кылаабынай судьуйанан үлэлээтэ. Билигин аны Иркутскайга, Дальнай Восток 15-16 саастаах уолаттарга күрэхтэһиитигэр үлэлии тиийдэ.

Кини, бэҕэһээ аҕай түмүктэммит республика чемпионатын туһунан бэйэтин санаатын маннык үллэстэр:

-Кытаанах киирсиилэр 51 уонна 60 кг буоллулар. Кыайыылаахтар, судьуйалар быһаарыыларынан 3:2 ахсаанынан хоттулар. Мухаммадаюб Исмаилов – Ренат Захаров киирсиилэригэр, Исмаилов икки бастакы рауну эрэллээхтик ыыппыта. Онтон үһүс рауҥҥа арыый мөлтөхтүк киирсэн, түмүккэ 29:28 ахсаанынан (5:0) кыайыыны Исмаиловка биэрдилэр. Онтон 60 киилэҕэ сүрүн утарсааччылар Валентин Иванов – Виталий Стручков көрүстүлэр. Бу уолаттар иккиэн соторутааҕыта Дальнай Восток чемпионатын финалыгар көрсөн тураллар. Онно Стручков 3:2 ахсаанынан баһыйбыта. Бу сырыыга судьуйалар санаалара Ивановка буолла. Онон кыайыылаахтар сөпкө быһаарылыннылар дии саныыбыт.

Айтал Дьяконов (63,5 кг) утарсааччыта Хотугулуу Арҕаа зона чемпиона, Польша, Латвия, Литва, Германия норуоттар икки ардыларынааҕы турнирдарын кыайыылааҕа Егор Янков кэлэн кииристэ, чемпионаты сэргэхситтэ. Кинини Айтал үс раунд тухары баһыйа тутан, иккис-үһүс рауннарга нокдаун аахтаран, эрэллээхтик кыайда.

Петр Егоровка (86 кг) биир дойдулааҕа, Павловскайтан сылдьар Владимир Колесов илиитин эчэтэн финалга рингэҕэ тахсыбата. Онон быһа кыайыы Петр Егоровка бэрилиннэ. Ян Алексеев Михаил Варламовтыын (57 кг) тэҥҥэ сыһа киирсэн хоттордо.

Нерюнгрилар поезтара эрдэ барар буолан, боксёрдарын эрдэ киирсиһиннэрэргэ көрдөспүттэрэ. Онно эмиэ куруук эрийсэр Арчын Пустоляков – Александр Литовченко (67 кг) көрүстүлэр. Ааспыкка Нерюнгри уола 3:2 ахсаанынан кыайбыт эбит буоллаҕына, бу сырыыга Пустоляков үчүгэй бэлэмнээҕин, кыахтааҕын көрдөрөн, 5:0 эрэллээхтик хотон чемпион аатын ылла. Ити курдук, ыарахан ыйааһыҥҥа Петр Константинов (Уус Алдан) – Никита Сухановы (Нерюнгри) баһыйа тутан, уус алданнар икки кыһыл көмүстэннилэр.

Спорт маастара Константин Бурцев этэринэн, 32 сыл буолан баран, Уус Алдаҥҥа кини кэнниттэн боксаҕа саҥа чемпион кэллэ. Онон бу улуус спортсменнара буолан ааспыт чемпионакка кыттыылара ситиһиилээх буолла диэххэ сөп. Намтан Борис Саввинов (92 кг) сырыы ахсын финалга тахсан, наар Шамиль Новрузовка, Петр Егоровка хотторор этэ. Быйыл дьэ бастакы миэстэни ылан үөрдэ-көттө.

Оттон Рустам Дьяконов уонна Рустам Туприн (48 кг) ааспыкка, 19-22 саастаахтарга Дальнай Восток чемпионатыгар эмиэ бэйэ-бэйэлэрин кытта көрсөн тураллар. Онно Дьяконов бэрт сытыытык утарсан хотторбута. Оттон билигин бэлэмэ арыый тиийбэтэ.

54 кг Айаал Степанов сиппит-хоппут киирсиилэри көрдөрдө, утарсааччыларын киһилээбэтэ. 71 кг финал: Малгин – Юмшанов көрүстүлэр. Юмшанов бу чемпионакка үс киирсиини ыытан, спорт маастарыгар кандидат нуорматын толордо. Салгыы ыйааһыҥҥа Артур Голиков Вахит Гадимовы кыайда. Гадимов Горнайга оскуолаҕа физкультура учууталынан үлэлиир. Онон уруккута буолбатах, күүстээх дьарыга суоҕа көстөр. Голиков соторутааҕыта Улан-Удэ рингэтигэр иккис буолбута. Онон эбиллэн иһэрин санатар тоҕоостоох.

Чемпионнары наҕараадалааһыҥҥа СР физическэй культураҕа уонна спорка министрэ Леонид Спиридонов, кини солбуйааччыта Гаврил Мохначевскай, СР боксаҕа федерациятын президенэ Петр Алексеев, СР физическэй культураҕа уонна маассабай спорка управлениетын начальнига Роман Оконешников, СР оҕо спордугар холбоһугун дириэктэрэ Михаил Варламов, СР сүүмэрдэммит боксаҕа сүүмэрдэммит хамаандатын кылаабынай судьуйата Владимир Павлов кыттыыны ыллылар.

Боксаҕа бэриниилээх, быйыл 70 сааһын туолбут Лука Парников – Чемпионат бастыҥ судьуйатынан ааттанан, 20 тыһ. солк. сертификат туттардыбыт. Чемпионат бастыҥ боксёрунан Айтал Дьяконов буолла.

Петр ПАВЛОВ.