Алын кылаас уолаттара туһуннулар

Сунтаар улууhун киинигэр Сунтаар нэhилиэгэр, В.Г. Павлов аатынан начальнай оскуолаҕа Саха Республикатын үөрэҕэриитин туйгуна, РФ уопсай үөрэхтээһинин бочуоттаах үлэһитэ Вадим Егорович Семенов сырдык кэриэһигэр анаан начальнай кылаас оҕолоругар көҥүл тустууга күрэхтэһии буолан ааста.

Вадим Егорович Сунтаар улууһугар Тойбохойго, Аллаҥаҕа нуучча тылын уонна литературатын учууталынан, дириэктэринэн үлэлээбитэ. Үлэлиир сылларын тухары спорду өрө тутара, өйүүрэ, тренердэри кытары ыкса билсэрэ, үлэлэһэрэ, начальнай оскуола иһигэр тустууга, хапсаҕайга күрэхтэһиилэри бастакынан киллэрбитэ.

Күрэхтэһиибит үөрүүлээх арыллыытыгар Сунтаарбыт улууһун баһылыга Анатолий Васильевич Григорьев кэлэн, эдэр бөҕөстөргө алгыс тыллары этэн ситииһилэри уонна доруобуйаны, чөл олоҕу тутуһууга алгыс тыллары эттэ. Эдэр кэскилээх тустууктарбытын көрөн астынна.

Күрэхтэһии сүрүн суолтата диэн, чөл олоҕу тутуһуу, эдэр оҕолору спорка сыһыарыы уонна Вадим Егорович Семеновы кэриэстээһин буолар. Быйыл  сэттис төгүлүн ыытыллар күрэхтэһиигэ барыта 100 оҕо уон ыйааһыҥҥа күрэхтэстэ. Сунтаар нэһилиэктэриттэн, Сунтаар бэйэтэ, Шея, Күндэйэ, Бүлүүчээн, Тойбохой уонна Ньурбаттан тиийэ кэлэн, түһүлгэни киэргэттилэр. Бу күрэхтэһииттэн биллэр тустууктар, билигин республика, Россия лидердэрэ Лев Павлов, Кэскил Семенов, Юлиан Григорьев, Аслан Трофимов, Харысхал Григорьев, Денис Максимов уо.д.а. үүнэн тахсыбыттара.

Судьуйаларынан – республикатааҕы катерегориялаах судьуйалар: Эллэй Дмитриев, Пётр Сидоров, Александр Львов үлэлээтилэр. Күрэхтэһии түмүгүнэн “Кыайыыга дьулуурун иһин”, “Бастыҥ техникатын иһин”, “Кэскиллээх тустуук”, “Саамай кырачаан тустуук” диэн анал бириистэр ананан туттарылыннылар.

Түмүккэ абсолютнай тустуу буолла, онно кыайыылааҕынан Саян Игнатьев (3 №-дээх оскуола 4-с кылааһын үөрэнээччитэ) финалга Семён Павловы (1-кы №-дээх оскуола 4-с кылааһын үөрэнээччитэ) кыайда.

2009 сылтан икки сыл буола-буола Вадим Егорович аатыгар тустууга күрэхтэһии тэриллэн ыытыллар. Бу күрэхтэһиини начальнай оскуола коллектива, В.Е. Семенов дьиэ кэргэнэ тэрийэн ыытар. Күрэхтэһиибит өссө улаатар, кэҥиир кэскиллээх. Атын ханнык эмэ сиргэ маннык, алын кылаас уолаттарыгар тустууга улуустааҕы күрэхтэһии ыытыллар дуо?

Өссө биирдэ махтанабыт, В.Г. Павлов аатынан начальный оскуола дириэктэригэр Назаров Алексей Семёновичка, оскуола коллективыгар уонна Семеновтар дьиэ кэргэҥҥэ. Вадим Семёнович аата аар саарга аатыра турдун! Үөрэппит, такайбыт оҕолорун, доҕотторун, тустууктар, Сунтаардар сүрэхтэригэр өрүү баар!

Владимир ДАНИЛОВ, Сунтаардааҕы оҕо спортивнай оскуолатын тренерэ.