Уон ыйааһынтан – 7 чемпион!

Олунньу 16-17 күннэригэр Бурятия Республикатын киин куоратыгар Улан Удэҕэ улахан дьоҥҥо көҥүл тустууга Дальнай Восток федеральнай уокуругун чемпионата ыытыллан түмүктэннэ.

Бу күрэхтэһии – Россия чемпионатыгар сүүмэрдиир сыаллаах-соруктаах буолан, улахан эппиэттээх күрэхтэһии. Ол курдук, ыйааһын ахсын үс бириистээх миэстэҕэ тиксибиттэр аны сайын бэс ыйыгар Дагестан Каспийскай куоратыгар ыытыллар дойду чемпионатыгар кыттар быраабы ылаллар.

Дьэ, маннык эппиэттээх түһүлгэҕэ Саха сирин эр дьоҥҥо хамаандата барыта 19 (7 кыһыл көмүс, 4 үрүҥ көмүс уонна 8 боруонса) мэтээли ылары ситистэ. Олохтоохтор икки чемпионнаахтар уонна биир бастакы миэстэни Приморскай кыраай бөҕөһө ылла.

Кыайыылаах аатын ылар иһин быһаарыылаах хапсыһыылартан Сунтаартан төрүттээх Дьулусхан Тотонов (65 кг) – бу күннэргэ Ираҥҥа, кулууптар икки ардыларыгар Аан дойду Кубогар кытта сылдьар Евгений Жербаев бииргэ төрөөбүт быраата Виктор Жербаевы халбарыйан түһэрэн ыраастык кыайбытын бэлиэтиир оруннаах. Ити курдук, биир эрэнэр бөҕөспүт Станислав Свинобоев (74 кг) бу чемпионакка сүрдээх кыахтаахтык тустан, бүтэһик быһаарыылаах тустууга утарсааччытын Буян Цыреновы көбүөргэ лаппаакыларынан хам баттаан кэбистэ. Онтон Максим Толмачев (97 кг) – Илья Жибаловы эрэллээхтик кыайда. Итинэн, финалга Саха сирэ – Бурятияны сирэй көрсүүгэ 3:1 ахсаанынан хотто. Биһигиттэн арай, Петр Константинов (61 кг) – Россия чемпионатын призера, норуоттар икки ардыларынааҕы кылаастаах спорт маастара Жаргал Дамдиновка сабырыйтарда.

57 киилэҕэ Алексей Копылов финалга туста тахсыбакка, кыайыы Айаал Белолюбскайга быһа бэрилиннэ. Хамаанда хапытаана Ньургун Сергин эмиэ, финалга утарсааччыта аккаастанан, тустубакка бастаата.

Онон, региоҥҥа сүрүн утарсааччыларбыт буряттар дьиэлэригэр тиийэн дьоһун көрдөрүү ситиһиллибитинэн, бары миэстэлэспит бөҕөстөрү, кылаабынай тренер Александр Оконешниковы уонна тренердэр: Будимир Яковлевы, Гаврил Игнатьевы, Иннокентий Посельскайы, Прокопий Иванову, Василий Уваровы, Степан Сивцеви эҕэрдэлиибит!

Манна даҕатан эттэххэ, кыргыттарбытыттан Светлана Васильева (62 кг) чемпионнаата, Ксения Леханова (50 кг) уонна Александра Карамзина (53 кг) иккис миэстэҕэ таҕыстылар.

PS: Чемпионат кэккэ быһаарыылаах хапсыһыыларын видеотын “Дьулурҕан” хаһыат ютуб каналыгар көрүөххүтүн сөп.

Чемпионат түмүк көрдөрүүтэ:

57 кг: 1. Айаал Белолюбскай, 2. Алексей Копылов, 3. Харысхал Григорьев, 3. Любомир Ашеин (бары – Саха сирэ).

61 кг: 1. Жаргал Дамдинов (Бурятия), 2. Петр Константинов, 3. Дьулустаан Федотов (иккиэн – Саха сирэ), 3. Алдар Мункуев (Бурятия).

65 кг: 1. Дьулусхан Тотонов (Саха сирэ), 2. Виктор Жербаев, 3. Эрдэм Шарастепанов (иккиэн – Бурятия), 3. Александр Иванов (Саха сирэ).

70 кг: 1. Олег Фомин, 2. Владислав Кривошапкин (иккиэн – Саха сирэ), 3. Булат Батоев, 3. Саян Жигзымаев (иккиэн – Бурятия).

74 кг: 1. Станислав Свинобоев (Саха сирэ), 2. Буян Цыренов (Бурятия), 3. Николай Сивцев (Саха сирэ), 3. Цыден Цыденов (Бурятия).

79 кг: 1. Тумэн Бодиев, 2. Очир Доржиев (иккиэн – Бурятия), 3. Айсен Потапов, 3. Василий Кириллин (иккиэн – Саха сирэ).

86 кг: 1. Мгер Кочоян (Приморскай кыраай), 2. Буянто Шадапов, 3. Максим Судаков (иккиэн – Бурятия), 3. Эмиль Рамазанов (Хабаровскай кыраай).

92 кг: 1. Ньургун Сергин (Саха сирэ), 2. Валентин Груздев (Хабаровскай кыраай), 3. Аюр Нимаев (Бурятия), 3. Никита Софронов (Саха сирэ).

97 кг: 1. Максим Толмачев (Саха сирэ), 2. Илья Жибалов, 3. Андрей Елбаскин (иккиэн – Бурятия).

125 кг: 1. Никита Хабаров, 2. Андрей Аронов (иккиэн – Саха сирэ), 3. Амгалан Бакшеев (Бурятия).

Петр ПАВЛОВ.