Уолаттарбыт үһүөн мэтээллээхтэр!

Лида куоракка Беларусь Республикатын 23-гэр диэри саастаахтарга гректии-римнии тустууга аһаҕас күрэхтэһии буолан ааста. Манна, саха тустууга кыһатын үс иитиллээччитэ кытынна. Ити туһунан биһиэхэ, https://dzulurgan.ru сайтка анаан Р.М. Дмитриев аатынан Олимпийскай эрэл училищетын тренерэ Матвей Матвеев иһитиннэрэр.

Ол курдук, Гродно куорат аатыттан кыттар спорт маастара Александр Гурьев 55 киилэҕэ икки утарсааччытын кыайан баран, бүтэһик быһаарыылаах хапсыһыыга М.Ступакевичка сабырыйтаран иккис миэстэҕэ таҕыста. Новогрудок чиэһин көмүскүүр маастарга кандидат Александр Андреев 67 кг ыйааһыҥҥа үһүс бириистээх миэстэҕэ тигистэ. Ити курдук Гродноттан маастар Сергей Павлов 77 киилэҕэ пьедестал үһүс үктэлигэр тахсан, боруонса мэтээлинэн наҕараадаланна.

Санатан эттэххэ, А.Гурьев уонна А.Андреев Амма ыччаттара, оттон Павлов Мэҥэ Хаҥаластан төрүттээх.

Бырааттыы дойдуга үөрэнэ, эрчиллэ сылдьар уолаттарбыт үһүөн бириистээх миэстэҕэ киирбиттэрэ кэрэхсэбиллээх. Кинилэри уонна үөрэтэн-такайан таһаарбыт тренердэрин эҕэрдэлиибит! Өссө үрдүк кирбиилэри ылалларыгар баҕарабыт!

Биир дойдулаахтарбытыгар өрүү күүс-көмө, өйөбүл буолар Саха Республикатын физическэй культураҕа уонна спорка министрэ Леонид Николаевич Спиридоновка, Саха сирин спортивнай тустууга федерациятын вице-президенэ Дмитрий Румович Ушницкайга, «Өрөгөй» Спорка бэлэмнэнии киинин дириэктэрэ Михаил Дмитриевич Пахомовка, Олимпийскай эрэл училищетын дириэктэрэ Семен Сергеевич Чердоновка, Никита Васильевич Никифоровка (ХИФУ) – тренердэр махталларын тиэрдэллэр.

«Дьулурҕан».