Сонуннар

Саха сирин хамаандата 21 мэтээллэннэ

Олунньу 4-5 күннэригэр «Өрөгөй» Спорка бэлэмнэнии киинигэр көҥүл тустууга Дальнай Восток федеральнай уокуругун 21-гэр диэри саастаахтарга биирдиилээн бастыыр иһин күрэхтэһиитэ ыытыллан түмүктэннэ.

Уолаттарга 7 регионтан (Бурятия, Забайкальскай, Хабаровскай, Приморскай кыраайдар, Амурскай, Сахалинскай уобаластар, Саха сирэ) барыта 119 бөҕөс күөн көрүстэ.

Икки күннээх күрэхтэһии кыайыылаахтары быһаарда. Күрэхтэһиигэ биирдиилээн күүстээх, номнуо тустууну таптааччылар харахтарын далыгар сылдьар тустууктар кытыннылар. Ол курдук, Бурятияттан: уолаттарга Россия күрэхтэһиитин призера, Европа түһүлгэтин кыайыылааҕа Илья Жибалов, А.Крылов кэриэһигэр Бүтүн Россиятааҕы турнирга бастаабыт Аюр Нимаев, Саха сириттэн номнуо улахаттар ааннарын тоҥсуйар – Артём Слепцов, Игорь Матвеев уо.д.а. бааллар.

Сэрэйиллибитин курдук, ааттаммыт уолаттар бэйэлэрин ыйааһыннарыгар тэҥнээхтэрин булбатылар.

Түмүккэ Саха сирин хамаандата 5 бастакы, 6 иккис, 10 үһүс миэстэлэри ылла. Оттон сүрүн утарсааччыларбыт буряттар – 5 бастакы, 2 иккис уонна 2 үһүс миэстэлээхтэр. Тренердэр П.С. Иванов, И.С. Посельскай, Ю.В. Афанасьев, П.М. Капитонов иитиллээччилэрэ ордук үчүгэйдик тустубуттарын бэлиэтиир оруннаах.

Биллэрин курдук, бу күрэхтэһиигэ ситиһиилээхтик кыттыбыттар – муус устар ыйга Дьокуускайга былааннаммыт Россия уолаттарга күрэхтэһиитигэр кыттар быраабы ыллылар.

Күрэхтэһии кэнниттэн тута республика уолаттарга хамаандата – Саха Республикатын спорка уонна тустууга салалтатын кытта көрсүһүүтэ тэрилиннэ.

Буолан ааспыт күрэхтэһии туһунан салгыы: Саха Республикатын эдэрдэргэ сүүмэрдэммит хамаандатын сүрүн тренерэ Василий Неустроев интервьютун, күрэхтэһии бары кыайыылаахтарын уонна призердарын хаартыскаларын туһааннааҕынан, https://dzulurgan.ru сайт Интервью уонна Хаартыскалар диэн рубрикатыгар көрүөххүтүн сөп. Ону тэҥэ, быһаарыылаах хапсыһыылар видеоларын “Дьулурҕан” хаһыат ютуб каналыгар көрүҥ.

Түмүк көрдөрүү:

57 кг (21 кыттааччы): 1. Пётр Адамов, 2. Николай Охлопков (иккиэн – Саха сирэ), 3. Мухаммедамин Куштов (Хабаровскай кыраай), 3. Дамир Явловскай (Саха сирэ).

61 кг (21): 1. Артём Слепцов, 2. Виктор Яковлев, 3. Юлиан Григорьев, 3. Андрей Мидловец (бары – Саха сирэ).

65 кг (20): 1. Игорь Матвеев, 2. Аслан Трофимов, 3. Василий Григорьев, 3. Николай Спиридонов (бары – Саха сирэ).

70 кг (13): 1. Кирилл Мордовской (Саха сирэ), 2. Бабасан Подкаменев (Бурятия), 3. Самир Меликов (Хабаровскай кыраай), 3. Алексей Вензель (Саха сирэ).

74 кг (12): 1. Тамир Ешинимаев (Бурятия), 2. Андрей Румянцев, 3. Юлиан Сильвестров (иккиэн – Саха сирэ), 3. Цырен Дугаржапов (Бурятия).

79 кг (9): 1. Роман Николаев (Саха сирэ), 2. Зоригто Ухинов, 3. Галсан Очиров (иккиэн – Бурятия), 3. Илья Гладышев (Хабаровскай кыраай).

86 кг (9): 1. Арсалан Бальжинимаев (Бурятия), 2. Давид Аршакян (Амурскай уоб), 3. Виталий Ефремов, 3. Ньургун Малышев (иккиэн – Саха сирэ).

92 кг (6): 1. Аюр Нимаев (Бурятия), 2. Евгений Аронов (Саха сирэ), 3. Магомед-Эми Эжиев (Приморскай кыраай).

97 кг (4): 1. Илья Жибалов (Бурятия), 2. Жаргалан Будажапов (Забайкальскай кыраай), 3. Виталий Николаев (Саха сирэ).

125 кг (4): 1. Чингис Балжимаев (Бурятия), 2. Михаил Нестеров (Саха сирэ), 3. Всеволод Шадура (Приморскай кыраай).

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *

199039
Бүгүн : 330