Ким да умнуллубат, туох да умнуллубат…

80 сыл анараа өттүгэр, 1943 сыл олунньу 2 күнүгэр, Сэбиэскэй аармыйа саллааттара Сталинград кырыктаах кыргыһыытыгар кыайыыны ситиспиттэрэ.

Роман Михайлович Дмитриев аатынан Олимпийскай эрэл училищетыгар бу бэлиэ күҥҥэ аналлаах тэрээһини тыл биридимиэттэрин холбоһуга ыытта.

Сталинградтааҕы сэрии суолтатын, онно сахалар кыттыыларын туһунан история учуутала Егоров Егор Тимофеевич билиһиннэрдэ.

Бу уоттаах сэриигэ үлэһиттэрбит эһээлэрэ Михайлов Осип Михайлович,  Багимов Петр Андреевич, Сосин Тимофей Егорович, Местников Семен Иванович, Диодоров Афанасий Яковлевич, таайдара Тобуруокап Петр Николаевич, Сергеев Николай Васильевич хорсуннук кыттыбыттара. Дириҥ ис хоһоонноох ахтыылар үөрэнээччилэр, устудьуоннар болҕомтолорун тарта, сэҥээриитин ылла.

Сталинград сэриитигэр аналлаах библиотека тэрийбит кинигэтин  быыстапката тэрээһини өссө киэргэттэ.

Аҕа дойду Улуу сэриитигэр аналлаах викторина кыайыылааҕынан 3-с куурус устудьуона Павлов Илья буолла, иккис миэстэни Дрозд Кристина (8-с кылаас), үсүһү Николаева Николь (2-с куурус) ыллылар.

Дойдубут туһугар сэриилэспит, кыайыы иһин сырдык тыыннарын биэрбит хорсун буойуттарбытын хаһан да умнубаппыт, биһиги өйбүтүгэр-сүрэхпитигэр кинилэр өрүү тыыннаахтар.

Егор ЕГОРОВ, училище историяҕа уонна обществознаниеҕа учуутала.

Алла СИВЦЕВА (училище библиотекара) хаартыскаҕа түһэриилэрэ.