Сонуннар

Истиҥ-иһирэх Ийэ тылбыт…

Олунньу 9-15 күннэригэр училищебытыгар Саха тылын нэдиэлэтэ буолла. Ийэ тылбыт күнүн сахалыы таҥастаах, алгыстаах, арыылаах алаадьылаах көрүстүбүт, төрөөбүт тылбыт туһунан хоһооннорунан саҕалаатыбыт.

«Төлкөлөөх төрүт дойдубар», «Өбүгэм үтүө үгэстэрэ», «Ис туругу бөҕөргөтүү» диэн ДЬОҺУННААҔЫ КЭПСЭТИИ сүргэбитин көтөхтө. Биһиэхэ ыалдьыттаатылар: Саха Өрөспүүбүлүкэтин суруйааччыларын союһун чилиэнэ, суруйааччылар ситэриилээх сүбэлэрин чилиэнэ, суруналыыс, хоһоонньут, прозаик, общественник Акулина Михайловна Иванова-Бээрийэ кыыһа Хотойук Айгыына, “Арчы” дьиэтин иһинэн үлэлиир «Сандаар» түмсүү кыттыылаахтара уйулҕаһыт, арчыһыт, билгэһит Татьяна Алексеевна Захарова-Татыйык уонна Альбина Николаевна Саввинова-Кыталыына.

Төрөөбүт тыл уонна сурук-бичик күнүн көрсө училищебыт бибилэтиэкэтигэр кинигэ быыстапката турда. Быыстапкаҕа төрүт сахатын тылын чинчийиигэ олоҕун анаабыт, саха бастакы суругун-бичигин олохтообут, саха алпаабытын төрүттээбит лингвист-учуонай Сэмэн Андреевич Ноҕоруодап үлэтин, олоҕун сырдатар кинигэлэр, араас тылдьыттар, саха алпаабыта ааҕааччы сэҥээриитин ылла.

Саха бастакы интеллигеннэриттэн биирдэстэрэ, суруйааччы, бэйиэт, лингвист-тюрколог, общественнай деятель Гавриил Васильевич Баишев–Алтан Сарын төрөөбүтэ 125 сылыгар аналлаах тэрээһин буолла. Сахалартан аан бастакынан тиэрмин боппуруоһугар туруулаһан үлэлээбит Алтан Сарын айымньыларын, үлэлэрин ырыттыбыт, кэпсэттибит.

Иллэҥ кэммитигэр сахалыы остуол оонньууларын оонньоотубут. Оҕолор ис дууһаларыттан көхтөөхтүк кытталлара көрөргө олус үчүгэй. Өбүгэлэрбит олохторун-дьаһахтарын, оҕолорун хайдах ииппиттэрин мантан билэбит. «Хаамыска», «Хабылык», «Тырыыҥка», «Биэс ойбон», «Тыксаан», «Эрийии», «Уур. Тут», «Кырынааһы тут» курдук  киһи өйүн-санаатын сааһылыыр оонньуулары олус сөбүлээтибит.

Устудьуоннар профессиональнай үөрэхтээһин сайдыытын института тэрийбит Өрөспүүбүлүкэтээҕи «Тииҥ мэйии»  онлайн-оонньуутугар кытынныбыт. Боппуруостара ыарахан соҕус этэ, сахалыы өс хоһооннору олус да элбэҕи билбитим.

Үөрэнээччилэр уонна устудьуоннар икки ардыларыгар «Толкуйдаа. Оонньоо. Кыай» күрэххэ 9-с кылаас уонна 1(9)-1 куурус хамаандалара кыайыы өрөгөйүн биллилэр. «Ырылхай буочар» куонкурсугар училище үлэһиттэрэ Дария Егоровна МихайловаЛюбовь Степановна Неустроева, 3-с куурус устудьуона Кеша Бабаранов ааттаннылар.

Ийэ тылбытын үөрэтиэҕиҥ, төрөөбүт тылбытын таптыаҕыҥ, удьуорбутуттан хаалбыты харыстыаҕыҥ, утумнаан ылбыппытын убаастыаҕыҥ!

Николь НИКОЛАЕВА, Р.М. Дмитриев аатынан Олимпийскай эрэл училищетын 2-с куурсун устудьуона.

Сивцева А.К. хаартыскаҕа түһэриитэ.

 

Добавить комментарий

Ваш адрес email не будет опубликован. Обязательные поля помечены *

136667
Бүгүн : 176