Сонуннар

Ильменнээҕи кыргыһыыга анаан “Кыайыы уота” сүүрүү

Олунньу 23 күнүгэр КЫАЙЫЫ УОТА хамаанда Дьокуускай – Хомустаах – Нам маршрутунан барыта 80 км патриотическай хамсааһыҥҥа  кыттан, сүүрүү ыытта. Биллэрин курдук, 1943 сыллаахха олунньу 23 күнүгэр 19-с хайыһар биригээдэтэ бойобуой бирикээһи толоро Ильмень күөлгэ атаакаҕа киирэн – 1712 нуучча, 597 саха, 253 Сойуус атын норуоттарын уолаттара былдьаммыттара.

КЫАЙЫЫ УОТА хамаанда Ильмень күөлгэ икки төгүл кэриэстэбил сүүрүүнү ыыппыта. Бу олунньу ыйга кырыктаах сэрии 80-с сылын туолла. Биһиги бары умнубаппыт, 597 саха ньургун уолаттарын Ийэ дойдуну көмүскээн сырдык тыыннара кыргыһыы толоонугар охтубутун.

Сүүрүү кыттыылаахтарыгар Дьокуускайга, Кыайыы болуоссатыттан куораттааҕы бэтэрээннэр сэбиэттэрин салайааччытын солбуйааччы Егоров Клавдий Георгиевич КЫАЙЫЫ УОТУН туттарда. Умуллубат уокка бары сибэкки ууран, Сайсарыга баар Ильмень монумеҥҥа тиийэллэр. Онно кинилэри Ил Түмэн мунньаҕын председателин солбуйааччы Губарев Виктор Николаевич көрсөн, кэриэстэбил патриотическай факеллаах сүүрүүнү саамай сөпкө ыытылларын, ыччаттар хаһан да историяны умнубаттарын эттэ. Өйлөбүнньүккэ сибэкки дьөрбөтүн ууран, сүүрүү авиапорт аттыттан саҕаланар.

Намҥа, Хомустаах нэһилиэгэр спорт залга Аҕа уонна оҕо күрэҕин тэрээһинигэр күрэхтэһии, Аҕа дойду сэриитин кыттыылааҕар снайпер-орденоносец Новгородов Иван Федорович бирииһигэр ыытылынна. Нэһилиэк баһылыга Жирков Василий Гаврильевич көрсөн эҕэрдэ тыл этэн атаарда. Салгыы бөлөх – педагогическай үлэ ветераннарыгар, Учууталлар учууталларыгар Колесова Акулина Ильичнаҕа, Семен Семеновичка ыалдьыттаата. Учууталлар сүүрээччилэри сылаас чэйинэн, алаадьы бэлэмнээн үөрэн көрүстүлэр.

Салгыы сүүрэн, республикабыт олоҕор элбэх үтүө үлэлэри оҥорон хаалларбыт Ньургун Семенович Тимофеев пааматынньыгар сибэкки ууран, Кыайыы болуоссатыгар Нам улууһун баһылыга Слепцов Юрий Иннокентьевич, ветераннар сэбиэттэрин салайааччыта Кобякова Софья Дмитриевна, олохтоохтор көрсөллөр.

Бары көрсүбүт дьонноругар, сүүрүү кыттыылаахтара махтаналлар!

Сүүрүү кыттыылааҕа А.Р. Ядрихинская: “Мин бу саҥа сылга Горохов Дмитрий Николаевич тэрийбит ,,Кыайыы уотун кыргыттара” хамаандаларыгар киирбиппэр олус диэн үөрэбин. Кыргыттары үксүлэрин билэбин, бары бииргэ сүүрэбит, күрэхтэhиилэргэ кыттабыт. Эстафета сүүрүүтэ Ильмень күөлгэ саха ньургун буойуттарыгар ананна. Кинилэр сырдык ааттарын үйэтитэр, хорсун быhыыларын саха дьоно өйдүү-саныы сылдьарыгар, ытыктыырыгар, кэриэстииригэр сыалланан. Салайааччыбар Дмитрий Николаевичка махтанабын! Үтүө, холку майгытыгар, муударай эдэр дууhaтыгар, чөл олоҕу уhyйарыгар”.

Патриотическай сүүрүүгэ кытыннылар:

Виктория Баишева – “Главстройпроект” инженерэ.

Ирина Оготоева – ООО ФИН-ЭК компания сүрүннүүр специалиһа.

Марияанна Гаврииловна – Гос. Мунньах (Ил Тумэн) аппаратын старшай референэ.

Анна Ядрихинская – ГБУ РС (Я) ЯСДСОПИ медицина үлэһитэ.

Валентина Доргуева – үлэ уонна спорт ветерана, тренер-преподаватель.

Айгуля Михайлова – республикатааҕы байыаннай комиссириат старшай үлэһитэ.

Наталья Неустроева – детскэй клиническай центр бырааһа.

Ульяна Барашкова – Тыа хаһаайыстыбатын министерствотын эппиэттээх үлэһитэ.

Дмитрий Горохов – КЫАЙЫЫ УОТА хамаанда салайааччыта, патриотическай хамсааһыннары ыытар инициатора.

«Дьулурҕан».

Добавить комментарий

Ваш адрес email не будет опубликован. Обязательные поля помечены *

141133
Бүгүн : 241