Сонуннар

Икки бөҕөспүт Дан Колов турнирыгар тустуоҕа

Бу өрөбүл күннэргэ Болгария киин куоратыгар Софияҕа “Дан Колов” уонна “Николай Петров” ааттарынан спортивнай тустууга үгэскэ кубулуйбут норуоттар икки ардыларынааҕы турнир ыытыллар.

Аан дойду тустууга саамай кырдьаҕас түһүлгэтэ 60-с төгүлүн тэриллэр. Көбүөргэ – көҥүл, дьахталлар уонна гректии-римнии тустууктар тахсыахтара. Тэрийээччилэр суруйалларынан, 40 дойдуттан барыта 400-чэкэ спортсмен кыттара күүтүллэр.

Турнир састааба балачча күүстээх буолуох курдук. Ол курдук, аҥардас көҥүл тустууга – АХШ хамаандатыттан олимпийскай чемпион Кайл Снайдер, олимпийскай призёр Томас Гилман, Албанияттан аан дойду чемпиона Зелимхан Абакаров, Словакияттан Европа чемпиона Таймураз Салказанов, соторутааҕыта Египеккэ ыытыллыбыт турнир кыайыылааҕа Батырбек Цакулов, эдэрдэргэ Европа күрэхтэһиитигэр бастаабыт Абубакр Абакаров (Азербайджан), Рамазан Сари уонна Эрхан Ялалачи (Турция) уо.д.а. биллэр-көстөр бөҕөстөр сайаапкаҕа бааллар. Өссө Иран, Япония, Армения, Грузия, Казахстан курдук тустууга үгэс быһыытынан күүстээх дойдулар бөҕөстөрө бааллар.

Ити курдук, дьахталлар уонна гректии-римнии тустууларга эмиэ биирдиилээн күүстээхтэр кыттыахтара.

Бу улахан түһүлгэҕэ саха тустууга кыһатын иитиллээччилэриттэн Европа чемпиона Владимир Егоров (Хотугу Македония) уонна Европа чемпионатын призёра Николай Охлопков (Румыния) тустуохтара. Уолаттарбыт иккиэн 61 киилэҕэ кыттарга суоттаналлар. Кинилэргэ бу күрэхтэһии – Европа чемпионатын иннинэ бэйэ туругун тургутан көрүү быһыытынан буолуоҕа.

Программа быһыытынан 61 кг ыйааһыннаахтар кулун тутар 2 күнүгэр күрэхтэһиини саҕалыахтара. Сарсыныгар финаллар буолуохтара. Уолаттарбытыгар ситиһиилээх тустууну баҕарабыт!

“Дьулурҕан”.

 

 

Добавить комментарий

Ваш адрес email не будет опубликован. Обязательные поля помечены *

176537
Бүгүн : 103